ՀՀ-ում գիտության զարգացմանը մեծ տեղ է տրվում: Այս տեսակետից մեծ ծավալի գիտական աշխատանքներ են կատարվում ՀՀ ԳԱԱ տնտեսագիտության ինստիտուտում: Մասնավորապես, օրերս ինստիտուտում բացվեց արդիական սարքավորումներով կահավորված համակարգչային լաբորատորիան: Այն հնարավորություն կընձեռնի գիտաշխատողներին բարձրացնելու ոչ միայն իրենց մասնագիտական, այլ նաեւ տնտեսագիտության տարբեր հարցերի վերաբերյալ բազմակողմանի գիտելիքներ ունենալու մակարդակը: Կահավորված լաբորատորիան լավ հարթակ է հատկապես երիտասարդ, շնորհալի գիտաշխատողների, ասպիրանտների եւ բոլոր տնտեսագետների համար:
Բացման խոսքով հանդես եկավ ինստիտուտի տնօրենի ժամանավոր պաշտոնակատար,տնտեսագիտության թեկնածու, դոցենտ Մերի Մանուչարյանը: Նա կարեւորեց «Տնտեսագիտական լաբորատորիայի» դերը եւ նշանակությունը արդիական խնդիրների լուծման,փորձի փոխանակման, ՀՀ-ում տնտեսագիտական մտքի հետագա զարգացման համար: Լաբորատորիայի ստեղծման գործում հսկայական է ոչ միայն Մերի Մանուչարյանի, այլ նաեւ բաժնի վարիչ Վլադիկ Մանուկյանի, երիտասարդ եւ շնորհալի կրտսեր գիտաշխատողներ Դավիթ Պետրոսյանի, Հովհաննես Ասատրյանի եւ այլոց վաստակը: Նրանց ամենօրյա քրտնաջան եւ նվիրված աշխատանքով ծնվեց բնագավառում եզակի լաբորատորիան: Ուրախալի է նաեւ ,որ այն մեծ խանդավառությամբ են ընկալում հատկապես ինստիտուտի երիտասարդ գիտաշխատողները:
«Ինստիտուտը համագործակցում է ՀՀ Կառավարության տարբեր մարմինների, ստորաբաժանումների եւ նախարարությունների հետ: Հաշվի առնելով այն հանգամանքը, որ Գիտությունների ազգային ակադեմիան ՀՀ Կառավարության պաշտոնական խորհրդատուն է: Ուստի ավելի եմ կարեւորում ինստիտուտի կողմից շարունակական վերլուծությունների եւ կիրառական առաջարկությունների ներկայացումը կառավարությանը»,-զրույցի ժամանակ ասաց Մերի Մանուչարյանը:
Հարկ է նշել նաեւ,որ ինստիտուտի երիտասարդ գիտաշխատողների գիտական աշխատանքները հրատարակվում են Եվրոպական հեղինակավոր գիտական պարբերականներում, ինչը կարեւոր է մեր երկրի եւ ակադեմիայի հեղինակության համար: Առաջիկայում նախատեսվում են նաեւ մի շարք թեկնածուական եւ դոկտորական ատենախոսությունների պաշտպանություն: Առաջիկայում լույս կտեսնի ինստիտուտի հերթական գիտական աշխատությունների ժողովածուն եւ այլն: Ինստիտուտի աշխատակիցները գիտական դասախոսություններով հանդես են գալիս աշխարհի տարբեր երկրների գիտական կենտրոններում: Օրինակ, վերջերս ինստիտուտի տնօրենի ժամանավոր պաշտոնակատարը գտնվում էր Հունաստանում, որտեղ պայմանավորվածություններ են ձեռք բերվել գիտական հետագա կապերի ընդլայնման համար: Օրերս ինստիտուտի գրադարանը համալրվեց արտասահմանում հրատարակված նոր գրականությամբ:
ՍՏԵՓԱՆ ՊԱՊԻԿՅԱՆ
