Երևանի բնակիչները բողոքում են՝ աղբահանությունը թերի է կատարվում։
Աղբամանների լցվածությունից ու դրանց շուրջը գոյացած աղբակույտերից կարելի է ենթադրել, որ աղբահանություն չի արվում արդեն մի քանի օր։
Փոխքաղաքապետ Տիգրան Ավինյանն այսօրվա գործակարգավարական խորհրդակցության ժամանակ անդրադարձել է խնդրին ու ասել, որ խորհրդական Կամո Արեյանը բացատրի, թե որն է վատ աղբահանության պատճառը։
«3 օրվա շրջայցերի արդյունքում նկատել ենք, որ որոշ վարչական շրջաններում ու թաղամասերում աղբահանության հարցը սրվել է, ժամանակացույցը խախտվել է։ Վիճակն այսօր էլ բարվոք չէ, ունենք տեխնիկայի խնդիր։ Անձամբ եղել եմ աղբահանությունն իրականացնող ընկերության պարկում։ Պետք է պահանջել տնօրինությունից, որ ժամանակացույց սահմանվի։ Այդ հիմնարկում պետք է խստացվի տեխնիկայի նկատմամբ հսկողությունը։ Դա վերաբերում է և՛ ձմռանն աշխատող տեխնիկային, և՛ փոշեկուլներին, և՛ աղբատարներին։ Տնօրենի հետ պայմանավորվել ենք, որ յուրաքանչյուր անսարք, փչացած մեքենայի վերականգնման համար ժամակետներ նշի, որպեսզի կարողանանք լիարժեք շարժակազմով սպասարկել քաղաքը»,- ասաց Արեյանը։
