Եմենի խորհրդարանը ընդունել է օրենք, որն արգելում է երկրի տարածքում անօդաչու ինքնաթիռների օգտագործումը: Այդ մասին հաղորդում է Ֆրանսպրեսը, վկայակոչելով եմենյան Սաբա լրատվական գործակալությանը:
Եմենում անօդաչու ինքնաթիռների բոլոր թռիչքները ղեկավարում է ամերիկյան ԿՀՎ-ն, որը փորձում է պայքարել «Ալ Ղաիդայի» անդամների դեմ: Օրենքի ընդունման առթիվ ԱՄՆ-ի արձագանքը դեռեւս անհայտ է:
Պատգամավորները նոր օրենքն ընդունել են անօդաչու ինքնաթիռի հետ կապված նոր միջադեպից հետո, որի հետեւանքով զոհվեցին խաղաղ բնակիչներ: Դեկտեմբերի 13-ին Ռադաա քաղաքի շրջանում նման ինքնաթիռի հարվածից զոհվել էին հարսանեկան հանդիսություններին մասնակցող 17 անձինք: Ըստ որում, հաջողվել էր ոչնչացնել նաեւ որոնվող մի քանի ահաբեկիչների:
Տարբեր աղբյուրների համաձայն, անօդաչու ինքնաթիռների հարվածների հետեւանքով Եմենում սպանված խաղաղ բնակիչների թիվը տատանվում է մի քանի հարյուրից մինչեւ առնվազն հազար մարդու սահմաններում:
