Հենրիխ Մխիթարյանը մասնակցել է Դորտմունդի «Սուրբ Յոհաննես» հիվանդանոցում կազմակերպված բարեգործական միջոցառմանը: Նա ներկայացրել է «Բորուսիայի» նոր բարեգործական օրացույցն իր ինքնագրով: Միջոցառման ընթացքում Հենրիխը ստորագրել է 385 օրացույցի վրա, որոնցից յուրաքանչյուրը վաճառվել է 10 եվրոյով: Այդ գումարի կեսը կփոխանցվի «Դորտմունդի երեխաները վտանգի մեջ են» հիմնադրամին, որն օգնում է քաղաքի սոցիալապես անապահով երեխաներին:
«Բորուսիան» այս տարվա իր վերջին հանդիպումը կանցկացնի դեկտեմբերի 21-ինՙ մրցելով «Հերտայի» հետ: Այնուհետեւ ֆուտբոլիստներին կարճատեւ արձակուրդ կտրամադրվի: Հունվարի 5-ից «Բորուսիան» կսկսի նախապատրաստվել առաջնության 2-րդ շրջանին, որը կմեկնարկի հունվարի 25-ին: Իսկ մինչ այդ թիմը հունվարի 9-17-ը ուսումնամարզական հավաք կանցկացնի իսպանական Լա Մանգայում: Այնտեղ «Բորուսիայի» ֆուտբոլիստները ստուգողական խաղեր կանցկացնեն բելգիական «Ստանդարտի», գերմանական «Բոխումի» եւ գերմանական «Կայզերսլաուտերնի» հետ:
