Ռուսաստանը զգալի առաջընթաց է արձանագրում Ադրբեջանի և Հայաստանի միջև տրանսպորտային հաղորդակցությունների ապաշրջափակման շուրջ համաձայնության գալու հարցում. հայտարարել է ՌԴ փոխվարչապետ Ալեքսեյ Օվերչուկը Ռուսաստանի, Ադրբեջանի և Հայաստանի աշխատանքային խմբի նիստի արդյունքներով, որն ուրբաթ օրը տեղի է ունեցել Մոսկվայում՝ երկրների փոխվարչապետերի համանախագահությամբ. գրում է infoport.am-ը։
«Գոհունակությամբ զգալի առաջընթաց արձանագրվեց Ադրբեջանի Հանրապետության և Հայաստանի Հանրապետության միջև տրանսպորտային հաղորդակցությունների ապաշրջափակման ձևերի համաձայնեցման հարցում։ Մասնավորապես, ընդհանուր փոխըմբռնում է ձեռք բերվել երկաթուղային հաղորդակցության վերականգնման ու կազմակերպման կոնկրետ քայլերի իրականացման վերաբերյալ Երասխի – Ջուլֆա – Մեղրի – Հորադիզ երթուղով։ Հանդիպումն անցել է կառուցողական մթնոլորտում»,- հավելել է նա, որի խոսքերը ներկայացված են ՌԴ կառավարության պաշտոնական կայքում։
Բանակցությունների արդյունքները, ինչպես նշել է ՌԴ փոխվարչապետը, կզեկուցվեն երեք երկրների ղեկավարներին։
«Կողմերը պայմանավորվեցին շարունակել աշխատանքը եռակողմ աշխատանքային խմբի շրջանակներում»,- ասել է Օվերչուկը։
