Ռուսաստան ելումուտ անող հայ միգրանտների խնդիրները օրակարգային են հայ-ռուսական միջկառավարական եւ միջխորհրդարանական հանձնաժողովների , ինչպես նաեւ զույգ երկրների միգրացիոն ծառայությունների աշխատանքում: Նկատի ունենալով հետաքրքությունը խնդրի նկատմամբ` ընթերցողին տեղյակ պահենք, որ ավարտին են հասցվում մի շարք համաձայնագրերի նախապատրաստումը, որոնցով այս տարեսկզբից հայ միգրանտների առջեւ ծագած խնդիրները պետք է որ լուծվեն:
Այս տարվա հունվարից Ռուսաստանը պատժամիջոցներ էր կիրառում այն անձանց նկատմամբ, ովքեր թեկուզ մի փոքրիկ խախտում են թույլ տվել կեցության եւ ելումուտի վերաբերյալ կանոններում: Խոսքն ընդհանուր առմամբ Ռուսաստանում մոտ 800 հարյուր հազար մարդու է վերաբերում, որոնցից 34 հազարը հայեր են, նրանց նկատմամբ մուտքուելքի հետ կապված պատժամիջոցներ են կիրառվել, իսկ 170 հազար հայ էլ մոտավորապես այս առումով գտնվում է ռիսկի գոտում: Այս թվերը հայտնել է ԱԺ փոխնախագահ Հերմինե Նաղդալյանը, եւ կարելի է ասել` պաշտոնական են, սակայն պատկերացրեք` ռիսկի գոտում գտնվողների թիվը կարող է կրկնակի լինել` հաշվի առնելով մի շարք հանգամանքներ: Սա ցույց է տալիս Ռուսաստան մեկնող միգրանտների թվի եւ Հայաստանից արտահոսքի ողբալի պատկեր, որն ուրիշ խոսակցության նյութ է: Սակայն այս մասին չէ այսօր մեր հրապարակումը, ուղղակի արդեն իսկ պատժամիջոցների ենթարկված եւ ռիսկի գոտում գտնվող մեր քաղաքացիներին հայտնենք, որ բանակցությունների արդյունքում այս տարվա ապրիլի 1-ից որեւէ հայ մարդու նկատմամբ պատժամիջոցային որոշում չի կայացվել արդեն, իսկ 34 հազարի նկատմամբ էլ համաձայնագրերի մոտակա ստորագրումից հետո ամնիստիա կկիրառվի: Ընդհանրապես` նոր համաձայնագրերով շատ ավելի արտոնյալ ռեժիմ է սահմանվում հայ միգրանտների համար Ռուսաստանում, նրանց կարգավիճակը հավասարեցվում է ինտեգրացիոն երկրների (Ղազախստանի, Բելառուսի) միգրանտների կարգավիճակին: Սա` անկախ այն բանից, որ Հայաստանը միգուցե շուտով մասնակից կլինի Եվրասիական միությանը, որի իրավական դաշտով այս խնդիրները պետք է ավտոմատ լուծվեն: Այժմ այս խնդիրները փաստորեն անդամակցումից եւ նրա իրավական փաստաթղթերի գործողության մեջ մտնելուց ավելի վաղ են լուծվելու: Ըստ Ռուսաստանի միգրացիոն ծառայության ղեկավար Կոնստանտին Ռոմադոնովսկու` հայ միգրանտների վիճակն այդպիսով հավասարեցվում է ռուս միգրանտների կարգավիճակին, իսկ 90 օրից ավելի գտնվելու հայկական կողմի խնդրանքը զարմացնում է ռուսներին, բայց եւ` այս ուղղությամբ էլ մտմտուքներ կան:
