Եվրոմիության անդամ պետությունները հուլիսի 1-ին որոշել են միառժամանակ հետաձգել Ռուսաստանի դեմ նոր պատժամիջոցների ձեռնարկումը: Դրանց ընդունումը առհասարակ պատճառաբանվում է Ուկրաինայի ճգնաժամի մեջ Ռուսաստանի խաղացած դերով: Ֆրանսպրես գործակալությունը ԵՄ աղբյուրներ վկայակոչելով հաղորդում է, որ եվրոպացի պաշտոնյաները որոշել են հուլիսի 7-ին նոր հանդիպում անցկացնել պատժամիջոցների հարցը կրկին քննարկելու համար: ԵՄ անդամ 28 երկրների դեսպանները իրենց հերթին որոշել են «խորացնել» պատժամիջոցների հերթական փաթեթի նախապատրաստումը, որոնք առայժմ մնում են անհատների դեմ ուղղված «թիրախային» ձեռնարկումների մակարդակի վրա:
ԵՄ երկրների բարձրաստիճան դիվանագետները Բրյուսելում հավաքվել էին, որպեսզի Եվրոպայի խորհրդի հունիսի 27-ի որոշումների ոգով շարունակեն հակառուսական հավելյալ ձեռնարկումների հնարավորության քննարկումը: Եվրոպացի դիվանագետներից մեկը իր անունը չհրապարակելու պայմանով Ռոյթեր գործակալության թղթակցին ասել է, որ իրենք որոշել են «առավել խորությամբ դիտարկել իրավիճակը», որը «բավական անորոշ է»:
Եվրոպայի խորհրդի նիստում ընդունված հայտարարության մեջ 28 երկրների դիվանագետներ հիշեցրել էին, որ Եվրոմիությունը «սկսել է թիրախային պատժամիջոցներին առնչվող նախապատրաստական աշխատանքներ»: Նրանք պահանջել էին մինչեւ հունիսի 30-ը մշակել ԵԱՀԿ դիտորդների հսկողությամբ Ուկրաինայի արեւելքում հրադադարի պահպանումը ստուգելու մեխանիզմ: Նաեւ պահանջել էին «լուրջ բանակցություն սկսել նախագահ Պորոշենկոյի խաղաղության ծրագրի կիրառման շուրջը»:
Ուկրաինայի նախագահ Պետրո Պորոշենկոն հունիսի 30-ի երեկոյան հայտարարեց, որ ինքը չի երկարաձգի հունիսի 27-30-ը հայտարարված հրադադարը: Իրոք, հուլիսի 1-ին երկրի արեւելքում բանակը, գվարդիան եւ մյուս զինված կազմավորումները վերսկսեցին հարձակումները ռուսամետ անջատականների դեմ:
