ՕԴԱՆԱՎԱՅԻՆ ՈՂԲԵՐԳՈՒԹՅՈՒՆ, ՈՐԸ ՄԵԾ ՎԵՃԵՐԻ ԴՈՒՌ Է ԲԱՑՈՒՄ

Երեկ օդանավային ահավոր աղետ տեղի ունեցավ արեւելյան Ուկրաինայի երկնքում: Ըստ նախնական տեղեկությունների, ցամաքից արձակված հրթիռային հարվածով կործանվել է Ամստերդամից Կուալա-Լամպուրից թռչող մալայզիական «Բոինգ 777» ինքնաթիռը, որի բոլոր ուղեւորներըՙ 295 մարդ, զոհվել են, ներառյալ անձնակազմի 15 անդամները: Վթարից անմիջապես հետո ուկրաինական կողմը հայտարարեց, որ ինքնաթիռը խփվել է «Բուկ» հակաօդային համալիրի հրթիռով, արձակված «անջատողականների» կողմից: Չուշացավ ռուսական կողմի պատասխանը, թե ինքնաթիռի կործանման հեղինակը ուկրաինական հակաօդային պաշտպանության համակարգն է, քանի որ ռուսամետ ապստամբների կարողությունից դուրս էր 10 հազար մետր բարձրությամբ թռչող ինքնաթիռին հարվածելը, իսկ ինչ վերաբերում է ռուսական տարածքից խփված լինելու պնդումներին, բերվեց այն հակափաստարկը, որ կործանման պահին «Բոինգ 777»-ը գտնվում էր Ռուսաստանի սահմանից շուրջ 60 կմ հեռավորության վրաՙ ուկրաինական օդային տարածքում, եւ վերջին 4 օրերում ռուսական մարտական ինքնաթիռները որեւէ թռիչք չեն կատարել ուկրաինական տարածքների վերեւ: