Որքան էլ ՀՀ իշխանությունները թուրքական կողմին որոշ ձևակերպումներ են ներկայացրել ՝ փորձելով սրբագրել «Նեմեսիս»-ի հերոսներին նվիրված հուշարձանի տեղադրումը, սակայն սպառիչ պատասխան այդպես էլ չտրվեց, որը կկանխեր հայկական օդանավերի համար Թուրքիայի օդային տարածքի փակումը, Azg.am-ի թղթակցի հետ զրույցում ասաց թուրքագետ Նելլի Մինասյանը։
«Օրինակ՝ ՀՀ վարչապետը նշեց, որ հուշարձանի տեղադրումը ժողովրդավարության դրսևորում է, այս հարցը քաղաքային իշխանություններն են որոշել։ Հայտարարվեց, որ հուշարձանի տեղադրումը չի արտահայտում կառավարության վերաբերմունքը, և դա պետական քաղաքականություն չէ։
Այդ պատասխաններն, իմ կարծիքով, այդքան էլ բավարար չէին, որովհետև կա մի կարևորագույն փաստ, որ հայկական կողմը կարող էր օգտագործել. դա այն է, որ Հայոց ցեղասպանությունն իրականացրած և «Նեմեսիս» գործողության արդյունքում չեզոքացված թուրք պաշտոնյաները հենց թուրքական զինվորական տրիբունալների կողմից դատապարտվել էին մահապատժի։ Այնպես որ, թուրքական կողմի մեղադրանքներին կարելի էր նախևառաջ զուտ պատմական փաստերով հակադարձել»,-ասաց Նելլի Մինասյանը։
Թուրքագետի խոսքով՝ ՀՀ իշխանությունները նաև կարող էին հայտարարել, որ «Նեմեսիս» գործողությունը պատմական իրադարձություն է եղել և պետք է մնա պատմության էջերում՝ առավել ևս, որ Թուրքիան իրեն Օսմանյան Թուրքիայի ժառանգորդ չի ճանաչում։
«Իսկ ընդհանրապես, այստեղ ամենևին էլ հուշարձանի հարցը չէ. Թուրքիան ցանկացած այլ խնդիր կարող էր օգտագործել՝ Հայաստանի համար իր օդային սահմանները փակելու համար»,- ամփոփեց մեր զրուցակիցը։
Հիշեցնենք, որ Թուրքիայի արտգործնախարար Մևլյութ Չավուշօղլուն ավելի վաղ հայտնել էր՝ հայկական ինքնաթիռների համար Թուրքիայի օդային տարածքը փակելու որոշումն ընդունվել է Երևանում «Նեմեսիս» գործողության հեղինակներին նվիրված հուշարձանը տեղադրելու պատճառով։
Նախօրեին էլ 24TV-ին տված հարցազրույցում Չավուշօղլուն տեղեկացրել էր՝ Թուրքիան Հայաստանի VIP-անձանց օդանավերի համար ևս փակել է երրորդ երկրներ թռիչքների հնարավորությունը, այդ թվում` ՀՀ վարչապետ Նիկոլ Փաշինյանին սպասարկող թիվ մեկ ինքնաթիռի համար:
