Էրբիլից (Իրաքյան Քուրդիստան) ստացված հաղորդագրությունը տեղեկացնում է, որ Քուրդիստանի տարածքային կառավարության արտգործնախարար Ֆալահ Մուսթաֆան վերջերս ընդունել է Իրաքում Հայաստանի դեսպան Կարեն Գրիգորյանին եւ քննարկել փոխադարձ հետաքրքրություններ ներկայացնող հարցեր:
Հարավային Քուրդիստան կատարած իր առաջին այցի ժամանակ դեսպանը բարձր է գնահատել երկրի քաղաքական եւ տնտեսական զարգացումները, ինչպես նաեւ խաղաղ գոյակցության եւ կրոնական հանդուրժողականության նրա ջանքերը: Նա արտգործնախարարին տեղեկացրել է Էրբիլում ՀՀ հյուպատոսարան բացելու եւ Էրբիլ-Երեւան շաբաթական 2 թռիչք իրականացնելու առաջարկների ընդունման մասին, հույս հայտնելով, որ այդ քայլերը կխթանեն Հայաստանի եւ Քուրդիստանի միջեւ կապերի ամրապնդմանը:
Արտգործնախարար Մուսթաֆան ողջունել է Հայաստանի կառավարության գործադրած ջանքերը ընդգծելով, որ հյուպատոսարանի բացումը անկասկած նպաստելու է երկու կողմերի միջեւ քաղաքական, տնտեսական եւ մշակութային համագործակցության ընդլայնմանը: Նա նաեւ պատրաստակամություն է հայտնել ամեն կերպ աջակցել հայկական կողմի ջանքերին:
Արտգործնախարարն ու դեսպանը քննարկել են նաեւ տարածաշրջանային անվտանգության եւ հումանիտար օժանդակության հարցեր:
