Որպէս նուիրեալ ազգային գործիչ, Էտմոն Ազատեան մեծ բաց մը կը ձգէ իր ետին, միաժամանակ, ան հայութեան ժառանգ կը ձգէ իր հարուստ վաստակը. ՀԲԸմ

Թէքէեան Մշակութային Միութեան Ամերիկայի եւ Գանատայի Վարչութիւն

Յարգելի Վարչական Անդամներ,

Էտմոն Ազատեանի անակնկալ վախճանումը խոր ցաւ կը պատճառէ մեզի, որովհետեւ իր մեկնումով մեզմէ կը հեռանայ երկար տարիներու բարեկամ մը:

Էտմոն Ազատեան, կարկառուն դէմք մը հանդիսացաւ Սփիւռքի անցնող 60 տարիներուն:

Որպէս քաղաքական խորաթափանց վերլուծաբան, լրագրող եւ խմբագիր, ան իր իւրայատուկ տեսակէտները կ’արտայայտէր համարձակ եւ շեշտակի ոճով, որուն համար սիրուած եւ

յարգուած էր իր ժամանակակիցներէն: Լաւատեղեակ հայ եւ համաշխարհային քաղաքական զարգացումներուն, Էտմոն Ազատեան նաեւ հմուտ մասնագէտ էր հայոց պատմութեան եւ գրականութեան: Ջերմ պաշտպանն էր Հայաստանեայց Եկեղեցիին, յատկապէս Մայր Աթոռ Ս. Էջմիածնին եւ խոր հաւատք կը տածէր հայ համայնքներուն նկատմամբ:

Շրջանաւարտ Հ.Բ.Ը.Մ.ի Պէյրութի Յովակիմեան-Մանուկեան Վարժարանէն, Էտմոն Ազատեան երկարամեայ նուիրեալ անդամ էր Միութեան, տասնամեակներ շարունակ վարելով Հանգուցեալ Ցկեանս Նախագահ Ալեք Մանուկեանի անձնական քարտուղարի պաշտօնը: Իբր այդ, տարիներու ընթացքին ան մասնակից եղած է բազմաթիւ նախաձեռնութիւներու:

Որպէս նուիրեալ ազգային գործիչ, Էտմոն Ազատեան մեծ բաց մը կը ձգէ իր ետին, միաժամանակ, ան հայութեան ժառանգ կը ձգէ իր հարուստ վաստակը:

Մեր խորազգաց վշտակցութիւնը կը յայտնենք Էտմոնի հարազատներուն եւ այն կազմակերպութիւններուն, որոնց նուիրումով ծառայեց ան երկար տարիներ, իր ամբողջ կեանքի տեւողութեան:

Հանգիստ իր ազգանուէր հոգիին

Պերճ Սեդրակեան Նախագահ