Մարտի 30-ին, «Գլենմարկ» հյուրանոցում (Գլենդեյլ, Կալիֆորնիա, ԱՄՆ) բացվեց Նարինե Իսաջանյանի անհատական ցուցադրությունը: Աշխատանքները, որոնց մեծ մասը 10-20 տարվա վաղեմության են, արտահայտում են այն տպավորությունները, որոնք ունեցել է արվեստագետն ԱՄՆ տեղափոխության ընթացքում: Նարինե Իսաջանյանի աշխարհընկալումն իդեալիստական է: Ստեղծագործություններում երեւում է տեղափոխության թողած ազդեցությունը նրա արվեստի վրա: Իր գործերում նա արվեստի լեզվով փորձում է ներկայացնել մարդկային փոխհարաբերությունները տարբեր միջավայրերում: Նկարչուհու աշխատանքներում հստակ պատկերումներ պետք չէ փնտրել: Այնտեղ ամեն բան մտային չափման մեջ է: Միտքն ալիքի նման ծածանվում ու փոխանցում է արվեստագետի ապրումները: Սակայն հենց իրեն՝ արվեստագետին տարածությունը չի փոխում, այլ մտածելու տեղիք է տալիս: Մարդ լույս աշխարհ է եկել կոնկրետ նպատակով, ունի ասելիք, որոշակի առաջադրանք:
Նարինե Իսաջանյանի աշխատանքները համեմված են տարբեր գույներով, սակայն կապույտը նրա արվեստում առանձնահատուկ դեր է խաղում: Գույնը ֆորմայի միջոցով վերածվում է էներգիայի, տիեզերքից վերցնում է այն անհրաժեշտ տարրը, որն արվեստագետի միջոցով հաղորդակցվում է հանրությանը:
Սպիտակի վրա՝ սեւ, իրար հաջորդող բծեր՝ պատուհաններ, որոնք տանում են մի նոր՝ երազային աշխարհ, որը հոգեհարազատ է արվեստագետին, սակայն որոշ առումներով՝ անհաղորդ դիտորդին:
Բնության մեջ ոչինչ չի վերափոխվում, ամեն բան վերածնվում է, շարունակում իր ուղին՝ դեպի հավերժություն:
Ցուցահանդեսը գործելու է մարտի 13-ից մինչեւ ապրիլի 30-ը:
ՀՐԱՉՅԱ ԳԱԼՍՏՅԱՆ
