Օրերս Մոսկվայում գտնվող ՀՀ ԱԳ նախարար Էդվարդ Նալբանդյանը իր ռուս գործընկեր` Սերգեյ Լավրովի հետ հանդիպման ժամանակ ասել էր, որ Երեւանում «մոտ օրերս» սպասում են ՌԴ նախագահին: Հիշեցնենք, որ ավելի վաղ` Սարգսյան-Պուտին հեռախոսազրույցի ընթացքում երկու երկրների նախագահները պայմանավորվել էին, որ ապրիլի 24-ին ՌԴ նախագահը կլինի Երեւանում, իսկ մայիսի 9-ին ՀՀ նախագահը կմասնակցի Մեծ հաղթանակի մոսկովյան շքերթին: Սակայն, ինչպես հայտնում է «ԻՏԱՌ-ՏԱՍՍ» գործակալությունը, ՌԴ նախագահի մամուլի խոսնակ Պեսկովը հայտարարել է, որ ապրիլի 24-ին Թուրքիայում կայանալիք Չանաքքալեի ճակատամարտի 100-ամյակի միջոցառումներին «Ռուսաստանը կմասնակցի բարձր մակարդակով»: Միեւնույն ժամանակ, ըստ նույն աղբյուրի, Պեսկովը նշել է, որ ապրիլի 24-ին Պուտինի` Երեւան այցելության հարցը «դեռ քննարկվում է»:
Իմիջիայլոց նկատենք, որ չնայած «բարձր մակարդակը» անպայմանորեն նախագահական մակարդակ չէ, բայց ՌԴ նախագահը «հանկարծակի հիվանդանալու» սովորություն ունի, հետեւաբար այդ օրը Երեւանը Պուտինի կողմից կարող է ստանալ ուղերձ, որտեղ, իհարկե, անչափ կկարեւորվի հայ-ռուս ժողովուրդների դարավոր բարեկամությունը:
