Մարտի 11-ին Ուփսալայի հանրային գրադարանում տեղի ունեցավ շվեդ լրագրող, կոնֆլիկտաբանության մասնագետ Ռասմուս Քանբեքի դասախոսությունը՝ նվիրված հայ-ադրբեջանական եւ Սրցախյան հակամարտության վերլուծությանը: Միջոցառումը կազմակերպել էր Ուփսալայի հայ մշակութային միությունը: Այն առավել բովանդակալից դարձնելու համար պատմական դիտարկումներով իր ներդրումն ունեցավ շվեդահայ պատմաբան Վահագն Ավետյանը:
Երկու ժամ տեւողության ելույթում բանախոսը ներկայացրեց իր սեփական փորձով տեսածն ու լսածը եւ եզրակացությունները: Վերլուծության ենթարկեց Ադրբեջանի քաղաքական էլիտայի եւ ալիեւյան կլանի ողջ էությունը, քննադատական լույսի տակ քննարկեց Ռուսաստանի, Արեւմուտքի Թուրքիայի կողմից վարվող քաղաքականությունը: Խոսվեց հատկապես եվրոպական որոշակի քաղաքական գործիչների եւ պառլամենտականների կոռուպցիոն դրսեւորումները. այդ բացահայտումների մեջ հստակ էր նաեւ բանախոսի ունեցած ներդրումը:
Ռասմուս Քանբեքը նաեւ այն վերջին արտասահմանյան լրագրողը եւ ընդհանրապես վերջին արտասահմանցին է, որ կարողացել է այցելել Արցախ: Նա բազմիցս եղել է Հայաստանում եւ Արցախում, նաեւ Ադրբեջանում: Եվ քանի որ իրեն թույլ չի տվել մտնել ադրբեջանական խավիարական ծուղակի մեջ, նրան սկսել են տարբեր միջոցներով սպառնալ:
Ռասմուսի աշխատանքի արդյունքն «Ամեն օր մեռնում եմ դանդաղ» շվեդերեն գիրքն է:
ԿԱՐՈ ՀԱԿՈԲՅԱՆ
Ուփսալա, Շվեդիա
Խմբագրության կողմից.-Ռասմուս Քանբեքի՝ Արցախին եւ Ադրբեջանին վերաբերող երկու հոդվածներն Աշխեն Բախչինյանի թարգմանությամբ լույս են տեսել «Ազգ»ի 2022 թ. հունիսի 24-ի եւ հուլիսի 1-ի համարներում:
