ՀԱՅԱՍՏԱՆԻ ՍԱՀՄԱՆՆԵՐՈՒՄ ԼԱՐՎԱԾ Է

Վերջին օրերին ադրբեջանական կողմը գնդակոծում է Հայաստանի սահմանամերձ բնակավայրերը, հատկապես Տավուշի մարզի գյուղերն ու դիրքերը: Հակառակորդը սեպտեմբերի 1-ին եւ 2-ին հայկական դիրքերի ուղղությամբ նաեւ խոշոր տրամաչափի զինատեսակներ է կիրառել, եւ միայն հայկական կողմի զսպող գործողություններից հետո է մի փոքր հանդարտվել: Երկու թեթեւ վիրավոր կա տեղի բնակիչներից, հայկական բնակավայրերը բավական վնասներ են կրել գնդակոծություններից: Երեկ պաշտպանության նախարար Սեյրան Օհանյանը, խոսելով Հայասատան ԶՈՒ ստորաբաժանումների կանխարգելիչ պատասխանների մասին` նաեւ նշել է, թե սահմանի որոշ մասերում հակառակորդի դիրքն առավել հարմար է, եւ դրանից օգտվելով են ադրբեջանցիք խաղաղ բնակավայրերը գնդակոծում: Երեկ հակառակորդի գնդակից զոհվել է պայմանագրային զինծառայող Հայկ Դեւոյանը: Երեկ Հայաստանի նախագահը անվտանգության խորհրդի նիստ էր հրավիրել, որն անդրադառնում էր Հայաստանում սկսված «Շանթ-2015» հրամանատարաշտաբային պլանային զորավարժություններին: Հավանաբար նաեւ սահմաններին տիրող վիճակի եւ այդ առթիվ ձեռնարկվելիք քայլերի մասին եւս խոսվել է: