ԱՄՆ իշխանությունները Իրաքի ղեկավարությանը համոզել են Ռուսաստանից «օդուժի օգնություն» չխնդրել «Իսլամական պետության» ահաբեկչական խմբավորման դեմ մղվող պայքարում: Այդ մասին հայտարարել է ԱՄՆ զինված ուժերի շտաբների պետերի կոմիտեի ղեկավար, գեներալ Ջոզեֆ Դանֆորդը:
Նրա խոսքերով, «ամերիկացի պաշտոնյաները Իրաքի վարչապետ Հեյդար ալ-Աբադիին համոզել են, եւ նա Ռուսաստանին չի դիմել օդային հարվածներ հասցնելու խնդրանքով», հաղորդում է Ռոյթեր գործակալությունը:
Դանֆորդը հիշեցրել է, որ Իրաքի վարչապետը մոտ երկու շաբաթ առաջ կոչ էր արել «Իսլամական պետության» դեմ մղվող պայքարին մասնակից դարձնել Ռուսաստանին եւ Իրանին:
Սիրիայում ՌԴ օդուժը նախագահ Ասադի խնդրանքով սեպտեմբերի 30-ից հարվածներ է հասցնում իսլամիստների դիրքերին եւ զինապահեստներին:
