Ըստ մեր դիտարկումների, ադրբեջանական պետական լրատվական գործակալությունըՙ «Ազերթաջը», որոշ հրապարակումներ թողարկում է գերմաներեն լեզվով, դրանք ինձ ծանոթ ռուսերեն, անգլերեն տարբերակներով հասանելի չեն դառնում: Ստորեւ ներկայացվող շարադրանքը դրանցից մեկն է:
Նոյեմբերի 13-ին Կանբերայից ուղարկված թղթակցությունից իրազեկ ենք դառնում, որ Ադրբեջանն իր քարոզչական ակտիվությունը զարգացնում է նաեւ Ավստրալիայում: Այդ երկրում Ադրբեջանի դեսպանության տարածած հաղորդագրության համաձայն, Ներկայացուցիչների պալատի անդամ Լյուք Սիմփքինսը (Luke Simpkins) նոյեմբերի 12-ի նիստում Հայաստանին հորդորել է իր զինուժը ետ քաշել Ադրբեջանի գրավյալ տարածքներից: Պաշտոնական Երեւանի էթնիկ մաքրազտման քաղաքականության արդյունքն ավելի քան 350 հազար ադրբեջանցիների Հայաստանից տեղահանությունն է, իսկ ԼՂ եւ հարակից 7 շրջանների ապօրինի բռնազավթման պատճառով ավելի քան 750 հազար քաղաքացի իր տարածքում է դարձել բռնի տեղահանվածՙ ավելի քան 20 տարի զրկվելով հայրենի տնից, ասել է նա:
Ավստրալիացի խորհրդարանականը, ըստ նույն աղբյուրի, նշել է, թե «ՄԱԿ-ի ԱԽ Հայաստանի ագրեսիվ քաղաքականությունը դատապարտող 4 որոշում է ընդունել, եւ կարեւորն այն է, որ Ավստրալիան էլ այսպես կոչված ԼՂՀ չի ճանաչում»: Նա ակնարկել է նաեւ, թե հայկական զինուժը պատանդառել է ադրբեջանցի 3 քաղաքացիներիՙ Ասգարովին, Գուլիեւին, Հասանովին, վերջինը սպանված է, իսկ Կարմիր խաչի կոմիտեիՙ նրանց ազատ արձակելու միջնորդությունը արդյունք չի տվել: Հստակ տեղեկատվություն չկա նրանց գտնվելու վայրի եւ վիճակի մասին, իսկ նրանցՙ դիվերսիոն խմբին հարելու մասին լուրերը չեն համապատասխանում իրականությանը, ըստ Վուգար Աղայեւի թղթակցության հայտարարել է ավստրիալացի պատգամավորը, որ բարձրաձայնած խնդիրները խոստացել է ներկայացնել Ավստրալիայի արտգործնախարարինՙ Հայաստանի իր պաշտոնակցի ուշադրությանը հանձնելու պահանջով:
