Ռուսաստանի նախագահի խոսնակ Դմիտրի Բեսկովն ի պատասխան ԻՊ-ից նավթ գնելու պնդումները ապացույցներով ներկայացնելու Էրդողանի պահանջին նախորդ օրը հայտարարեց, թե Ռուսաստանն իր ունեցած փաստերը չի հրապարակիՙ իսլամիստների դեմ պայքարի շրջանակում ռազմահետախուզական գաղտնիքները չբացահայտելու մտահոգությամբ:
Ինչպես ծանոթ է, Թուրքիայի նախագահ Ռեջեփ Թայիփ Էրդողանը իր երկրի կողմից «Իսլամական պետության» նավթի գնման հետ կապված մեղադրանքները անվանել էր «անբարոյական»: Այդ մասին նա լրագրողներին հայտարարել էր Ֆրանսիայում: «Մենք այնքան անազնիվ չենք, որ նավթ գնենք ահաբեկիչներից: Եթե ապացուցվի, որ մենք դա արել ենք, ապա ես կթողնեմ իմ պաշտոնը: Եթե կան ինչ-ինչ ապացույցներ, թող ներկայացնեն, կտեսնենք», ասել է նա:
«Նման բան չի եղել, մենք երբեք անօրինական ճանապարհով նավթ չենք գնել: Ահաբեկչական կազմակերպությունների հետ այդպիսի գործարքները բացառված են: Մեր նավթի աղբյուրները ամենքին հայտնի են. Ռուսաստան, Իրան, Ադրբեջան, Իրաք, Ալժիր, Քաթար, Նիգերիա», շարունակել էր թուրք նախագահը:
Էրդողանը նաեւ հայտարարել էր, թե ԱՄՆ-ի տվյալներվ, Ռուսաստանի եւ Սիրիայի քաղաքացի ոմն Ջորջ Հասվանի իբր նավթ է գնում ԻՊ-ից եւ վաճառում է Դամասկոսին, բայց իր ասածի ապացույցներ չի բերել: Ռուսական կողմը Հասվանիի ՌԴ քաղաքացիությունը պաշտոնապես չի հաստատել եւ որեւէ մեկնաբանություն չի արել: ԱՄՆ-ը նույնպես ավելի վաղ չէր հայտարարել, թե Ռուսաստանին նման տվյալներ է տրամադրել:
Սիրիայի արտգործնախարար Վալիդ Մուալլեմը օրերս հայտարարել էր, որ Էրդողանի որդին թերեւս մասնակից է ԻՊ հետ նավթի անօրինական առեւտրին: Նրա խոսքերով, Թուրքիան հենց Էրդողանի որդու նավթային ընկերության շահերի պատճառով է խփել ռուսական «Սու-24» օդանավը: ՌԴ արտգործնախարար Սերգեյ Լավրովը իր հերթին ուշադրություն է դարձրել այն բանին, որ օդանավի միջադեպը տեղի է ունեցել ԻՊ նավթահանքերին ռուսական օդուժի հասցրած հարվածներից հետո: Նախարարի խոսքերով, դա պատահեց «այն բանից հետո, երբ մեր օդուժը սկսեց թիրախային եւ շատ արդյունավետ հարվածներ հասցնել այդ բենզատարներին եւ ընդհանուր առմամբ նավթահանքերին»:
Թուրքական F-16 ռազմօդանավը նոյեմբերի 24-ին «Սու-24»-ը խոցել էր սիրիական տարածքի վրա: ՌԴ նախագահ Վլադիմիր Պուտինը դա անվանել էր «ահաբեկիչների հանցակիցների հարված ՌԴ թիկունքին»:
Մոլորակի կլիմայական փոփոխություններին նվիրված փարիզյան համաժողովում մի շարք հանդիպումներ ունենալուց հետո Պուտինը հայտարարեց. «Մենք բոլոր հիմքերն ունենք ենթադրելու, որ մեր օդանավը խփելու որոշումը եւս թելադրված է եղել Թուրքիայի տարածքով դեպի նավահանգիստներ նավթառաքման ուղիների անվտանգության ապահովման ցանկությամբ»:
