Վարչապետ Հովիկ Աբրահամյանը հայտարարել է, որ ինքը եւս միանում է Գյումրիի 13 անօթեւան ընտանիքներին բնակարան գնելու նախաձեռնությանը: Հիշեցնենք, որ ռեժիսոր, լուսանկարիչ Հայկ Բարսեղյանի այս ծրագրին արդեն իսկ միացել են աշխարհահռչակ երաժիշտ Տիգրան Համասյանը, Սերժ Թանկեանը, Շառլ Ազնավուրը, «Ռեալ Մադրիդ» եւ «Բարսելոնա» ֆուտբոլային ակումբների որոշ ֆուտբոլիստներ, Հենրիխ Մխիթարյանը, այլք: Միայն Տիգրան Համասյանի մի համերգի արդյունքում 13 անօթեւան ընտանիքներից մեկն արդեն իսկ ունի բնակարան գնելու անհրաժեշտ գումար:
Վարչապետ Աբրահամյանը, սակայն շեշտել է, որ ինքը միանում է նախաձեռնությանը ոչ թե որպես վարչապետ, այլՙ որպես ՀՀ քաղաքացի եւ որպես վարչապետ ստացած իր մեկ ամսվա աշխատավարձը կտրամադրի նախաձեռնությանը: Դժվար է ասել, թե ի՞նչ կլիներ, եթե Հովիկ Աբրահամյանը որպես վարչապետ միանար այս նախաձեռնությանը, կամ եթե Հովիկ Աբրահամյանն իր ոչ թե ամսական աշխատավարձը տրամադրեր, այլ ամսական եկամուտները: Հավանաբարՙ Գյումրիում անօթեւան ընտանիքներ էլ չլինեի՞ն…
Համենայն դեպս, հինգշաբթի օրը կառավարության հերթական նիստում էկոնոմիկայի նախարարությանը կառավարության պահուստային ֆոնդից տրամադրվել է 150 հազար ամերիկյան դոլարՙ Ինֆորմացիոն տեխնոլոգիաների եւ ծառայությունների համաշխարհային ալյանսին Հայաստանի մասնակցությունն ապահովելու նպատակով:
