Գյումրու պետական մանկավարժական ինստիտուտում մայիսի 2-ին տեղի ունեցավ ՀՀ ԳԱ թղթակից անդամ, «Շիրակ Հայրենակցական միավորում» ՀԿ -ի վարչության անդամ, ծնունդով գյումրեցի պատմաբան պրոֆ. Նիկոլայ Հովհաննիսյանի «Քրդերի մասնակցությունը հայերի ցեղասպանությանը. քրդական գործոնը Արեւմտյան Հայաստանի հարցի լուծման հայկական հայեցակարգում» գրքի շնորհանդես-քննարկումըՙ հեղինակի մասնակցությամբ, որը կազմակերպել էին «Շիրակ» Հայրենակցական միավորումը եւ Գյումրու պետական մանկավարժական ինստիտուտը: Գիրքը լույս է ընծայվել Ռամկավար Ազատական կուսակցության նախաձեռնությամբ եւ ֆինանսավորմամբ:
Մասնակցում էին «Շիրակ Հայրենակցական միավորում» ՀԿ նախագահ Վարազդատ Ավոյանը, Գյումրու պետական մանկավարժական ինստիտուտի ռեկտոր, մանկ. գիտ. դոկտոր, պրոֆեսոր Վարդեւան Գրիգորյանը, ՌԱԿ ատենապետ, «Ազգ» օրաթերթի գլխավոր խմբագիր Հակոբ Ավետիքյանը, ՌԱԿ ատենադպիր, պատմ.գիտ. դոկտոր Սուրեն Սարգսյանը, թուրքագետ, ԵՊՀ Արեւելագիտության ֆակ.-ի փոխդեկան Ռուբեն Մեքոնյանը, ԵՊՀ միջազգային հարաբերությունների ֆակ-ի դոցենտ Վահրամ Պետրոսյանը, ՌԱԿ փոխատենապետ Կարեն Կակոյանը, լրագրող Պուշկին Սերոբյանը, ԳՊՄԻ դասախոսներ եւ ուսանողներ:
Հանդիպումն անցավ ջերմ, բուռն քննարկման մթնոլորտում, բանախոսները խոսեցին գրքի կարեւորության մասին, հեղինակին հղվեցին բազում հարցեր:
