Ադրբեջանի նախագահ Իլհամ Ալիեւը Թեհրանում Ադրբեջանի դեսպանատան դեմ հարձակումն անվանել է «ահաբեկչություն»՝ պահանջելով հետաքննել միջադեպն «ամենակարճ ժամկետում եւ մեղավորներին ենթարկել պատասխանատվության»։
Ինչպես տեղեկացվել էր ավելի վաղ, հունվարի 27-ի առավոտյան տղամարդը մտել է Իրանում Ադրբեջանի դեսպանություն եւ կրակ բացել՝ սպանելով մեկ մարդու եւ վիրավորելով երկուսին։
Թեհրանի քրեական դատարանի դատախազը տեղեկացրել է, որ կասկածյալը պնդում է, որ անցած տարվա ապրիլին իր կինը գնացել է Թեհրանում Ադրբեջանի դեսպանատուն եւ տուն չի վերադարձել։ Նրա խոսքով՝ տղամարդը Ադրբեջանի դեսպանատնից որեւէ պատասխան չի ստացել իր բազմակի այցելությունների ժամանակ, թե ուր կարող էր անհետանալ իր կինը, եւ մտածում էր, որ կինը թաքնվում է այնտեղ, Թեհրանում, եւ չի ցանկանում հանդիպել իր հետ։ «Այսօր առավոտյան ես որոշեցի գալ դեսպանատուն արդեն Կալաշնիկով ինքնաձիգով»,- ասել է նա քննիչներին՝ հավաստիացնելով, որ Թեհրանում դեսպանատան վրա հարձակման պատճառը անձնական էր։
Ավելի վաղ Թեհրանի ոստիկանապետը տեղեկացրել էր, որ հարձակվողը կալանավորվել է ոստիկանության կողմից միջադեպից անմիջապես հետո։
Նրա խոսքով՝ տղամարդը մտել էր դեսպանատուն իր երկու երեխաների հետ։ «Այսօր առավոտյան այդ մարդը մտել է Ադրբեջանի դեսպանատուն հրազենով (АК-47)։ Հարձակման հետեւանքով մեկ մարդ զոհվել, երկուսը վիրավորվել են։ Նա նաեւ նշել է, որ նախնական տվյալներով՝ հարձակվողն ունեցել է անձնական եւ ընտանեկան պատճառներ։
Իրանի ԱԳՆ-ի ներկայացուցիչ Նասեր Քանաանին ընդգծել է, որ անվտանգության իրանական ուժերն օպերատիվ գործողություններ են ձեռնարկել հարձակվողին կալանավորելու համար, եւ ներկայում քննություն է ընթանում։ «Այս հարցը կհետաքննվի գերակայության եւ նրբանկատության բարձրագույն աստիճանով, որպեսզի պարզվեն այս գործողության մասշտաբներն ու հարձակվողի դրդապատճառները»,- ավելացրել է ներկայացուցիչը։
Նա նշել է, որ նախնական հետաքննությունը ցույց է տալիս, որ հարձակվողն ունեցել է անձնական դրդապատճառներ՝ ավելացնելով, որ քննությունը կշարունակվի, իսկ արդյունքների մասին կտեղեկացնեն լրատվամիջոցներին։
