Վ. Բրյուսովի անվան պետական համալսարանն այլ բուհերի միացնելու խոսակցությունները կարծես նորից արդիական են դարձել, Azg.am-ի թղթակցի հետ զրույցում ասաց բուհի պրոռեկտոր Ցոլակ Ակոպյանը։
«Երբ առաջացավ Գիտության կոմիտեի միավորման հարցը, ակնհայտ դարձավ նաև բուհերի միավորմանն անցնելու հեռանկարը։ Այս պահին մի շարք նեղ գործընթացներ են ընթանում»,- ասաց մեր զրուցակիցը։
Ցոլակ Ակոպյանը շեշտեց՝ Բրյուսովի անվան պետական համալսարանը, ինչպես նախկինում, այժմ ևս շարունակելու է պայքարել այլ բուհերի հետ միավորման դեմ։
«Ուսանողությունն ու դասախոսական կազմն ամբողջությամբ պայքարելու են, ամեն բան անելու ենք, որպեսզի նման բան տեղի չունենա։ Թե ինչպես ենք պայքարելու, կոնկրետ այս ամսվա վերջ կորոշենք։ Այս պահին մեզ մոտ արձակուրդ է, դասեր չկան։ Երբ ուսանողները կգան, կորոշենք»,- ասաց բուհի պրոռեկտորը։
Հիշեցնենք, որ ՀՀ կառավարությունը մինչ օրս չի հաստատել Կարինե Հարությունյանի` Վ. Բրյուսովի անվան պետական համալսարանի` 2022 թ. դեկտեմբերի 9-ի հոգաբարձուների խորհրդի նիստում փակ, գաղտնի քվեարկության արդյունքներով ռեկտորի պաշտոնում ընտրվելու արդյունքները:
2022 թվականի դեկտեմբերի 22-ին էլ հայտնի էր դարձել, որ Պետական վերահսկողության ծառայությունը Վալերի Բրյուսովի անվան պետական համալսարանում մի շարք խախտումներ է հայտնաբերել և տեղեկանքներ ներկայացրել ՀՀ գլխավոր դատախազություն հետագա ընթացքն ապահովելու համար։ Մասնավորապես, ըստ ՊՎԾ-ի, բուհի ռեկտոր Կարինե Հարությունյանն ինքն իրեն հատկացրել էր 5,44 մլն դրամի չափով պարգևատրում և լրավճար։
