Քաղվածՙ Vesti.am-ից
Երեւանում հուլիսի 8-ին կայացավ «Համազգային Միասնություն» շարժման մարզային կառույցների ներկայացուցչական հավաքը, որին մասնակցում են Համաշխարհային հայկական կոնգրեսի եւ Ռուսաստանի հայերի միության նախագահ Արա Աբրահամյանը, մարզային կառույցների ներկայացուցիչները եւ ՀՀ տնտեսության զարգացման համար կարեւոր ոլորտների ներկայացուցիչները:
Մարզային կառույցների ներկայացուցիչներն ամփոփում են «Ազգային միասնություն» շարժման առաջին փուլը, ներկայացրին կարճ ժամանակահատվածում ձեռք բերած հաջողությունները:
Համաշխարհային հայկական կոնգրեսի եւ Ռուսաստանի հայերի միության նախագահ Արա Աբրահամյանն իր բացման խոսքում նշեց, որ իրենց ծրագրերի կյանքի կոչման եւ իրականացման կարեւոր քայլերից մեկը հոկտեմբերին Երեւանում կայանալիք խոշոր բիզնես-ֆորումն է, որը տեղի է ունենալու ՀՀ Կառավարության աջակցությամբ եւ Համաշխարհային հայկական կոնգրեսի, Ռուսաստանի հայերի միության նախաձեռնությամբ:
Իր ելույթում Արա Աբրահամյանը կարեւորեց հոկտեմբերի 13-16-ն անցկացվելիք բիզնես-ֆորումը, որը, ըստ նրաՙ կլինի այն հարթակը, որը կնպաստի մեր երկրի զարգացմանը:
Մենք բոլորս գիտենք մեր երկրի տնտեսական վիճակը եւ պետք է ասենք, թե ինչ ենք առաջարկում դրա համար եւ ինչպես ենք տեսնում այդ խնդրի լուծումը: Համոզված եմ, որ այն մեծ նշանակություն կունենա Հայաստանի զարգացման համար: Մենք չենք խոսում բողոքելու համար, մենք պետք է մտածենք ապագայի մասին ու ապրենք ապագայով,-ասել է Արա Աբրահամյանըՙ ընդգծելով, որ իրենք կարող են ստեղծել տնտեսապես զարգացած ու կայուն պետություն:
Ռուսաստանի հայերի միության նախագահն ասաց, որ Ռուսաստանում 3 միլիոնից ավելի հայ կա ու նրանցից շատերը մեծ ուրախությամբ կտեղափոխվեն Հայաստանՙ այստեղ աշխատելու եւ ապրելու համար, նույնը ԱՄՆ-ում եւ այլ երկրներում:
Մենք պետք է պայմաններ ստեղծենք մեր երկրի կայացման համար: Մենք կարող ենք ստեղծել հզոր պետություն,- եզրափակեց Արա Աբրահամյանը:
