«Բազմաթիվ, մանավանդ աղքատ երկրներում հողը չորանում է, անապատներն ընդլայնվում են, անասունները ոչնչանում, ջրային ռեսուրսները նվազում են կամ աղտոտվում», գրում է «La Vanguardia» պարբերականը: Ժողովրդագիրները նախազգուշացնում են, որ մի քանի տարի հետո սկսվելու է գաղթականների այնպիսի հոսք, որ դեպի Եվրոպա ձգտող փախստականների ներկայիս ալիքները կթվան խղճուկ առվակներ:
Ներքին տեղահանված անձանց մշտադիտարկման կենտրոնի (Նորվեգիայի փախստականների գործերի խորհուրդ) գնահատմամբ, 2014 թ. էկոլոգիական աղետների հետեւանքով իրենց տները լքել են 19,3 մլն անձինք:
Հիշյալ հրապարակման մեջ խոսվում է մասնավորապես 2010 թ. անսովոր շոգ եղանակի եւ երաշտի մասին. «Ռուսաստանում հացահատիկի բերքը կրճատվեց 33 տոկոսով, Ուկրաինայումՙ 18 տոկոսով: Մի քանի ամսում հացահատիկի գները կրկնապատկվեցին, ինչը հարվածեց մանավանդ Մերձավոր Արեւելքին եւ Հյուսիսային Աֆրիկային: Սիրիայում 2006-2011 թթ. երկրի պատմության մեջ ամենաահավոր երաշտը եղավ: Անասունների մեծ մասը կոտորվեց, մոտ 2 մլն մարդ գյուղերից հորդեց քաղաքներ, բայց այնտեղ աշխատանք չգտավ: Ջրի պաշարները դարձան դժվարամատչելի: Բողոքի ելույթները ճնշվում էին ուժային մեթոդներով, ինչը հող նախապատրաստեց քաղաքացիական պատերազմի համար, եւ հիմա պատերազմից փախչող սիրիացիները լքում են երկիրը»:
Մաքս Պլանկ ինստիտուտի (Գերմանիա) տնօրեն Իոս Լելիֆելդը կարծում է, որ Մերձավոր Արեւելքում 2050 թ. ամռանը գիշերային ջերմաստիճանը 300-ից չի իջնի, իսկ կեսօրին կհասնի 46 աստիճանի:
Մերձավոր Արեւելքում եւ Հյուսիսային Աֆրիկայում վիթխարի տարածքներ կդառնան կյանքի համար ոչ պիտանի, եւ այդ տարածաշրջանների 500 մլն բնակչության նշանակալի մասը ստիպված կլինի արտագաղթել:
Ջրի պատճառով նաեւ կծագեն պատերազմներ: Աֆրիկայում արդեն հիմա տարեկան միլիոնավոր մարդիկ մահանում են ծարավից: Վերջին կես դարում Չադ լճի մակերեսը կրճատվել է 85 տոկոսով:
Գոբի անապատը ընդլայնվում է տարեկան 10 հազ. քառ. կիլոմետրով, սպառնալով Մոնղոլիային եւ ՉԺՀ երկու նահանգների: Ալյասկայում եւ Գրենլանդիայում սառույցների հալքը խոչընդոտներ է ստեղծում որսորդության եւ ձկնորսության համար, ուստի բնիկները ստիպված են վերաբնակվել: «ՄԱԿ-ի գնահատումների համաձայն, ներկայումս մոլորակի վրա գաղթի դեպքերի ավելի քան 60 տոկոսը փոթորիկների, ջրհեղեղների կամ երաշտների հետեւանք է, իսկ մինչեւ 2050 թ. «կլիմայական գաղթականների» թիվը կհասնի 250 միլիոնի», ասվում է հոդվածում: Սակայն «կլիմայական գաղթականի» իրավաբանական կարգավիճակ մինչեւ օրս գոյություն չունի:
Կլիմայական փոփոխությունների հետեւանքները համամասնական առումով շատ ավելի զգալի են այն երկրներում, որոնք ջերմոցային գազեր քիչ են արտանետել, իսկ այժմ միջոցներ չունեն նոր պայմաններին հարմարվելու համար:
2007 թ. բրիտանացի դիվանագետ Քրիսպին Տիկկելը նախազգուշացրել էր, որ սննդի ու ջրի պակաս ունեցողները կդիմեն ծայրահեղ միջոցների, ինչը կբարձրացնի բռնարարքների մակարդակը:
