Լրագրող Սթեֆանի Դազիոն Օրադելի (Նյու Յորք) «Bergen County Record» պարբերականում տեղեկացնում է, որ ավելի քան հիսուն տարի անց Բերգեն կաթոլիկական ավագ դպրոցի միաբանների կողմից 1963-78 թվերին մանկապղծության ենթարկված 21 անձինք, որոնք հիմա 53-ից 68 տարեկան են, վերջապես կստանան դրամական փոխհատուցում:
Անցյալ տարի տուժած կողմի ներկայացուցիչները դպրոցի առաջ բողոքի ցույց են կազմակերպել նշելով, որ իրենց գործի հետաքննության վերանայումը շատ երկար է տեւում: Ի վերջո կողմերը համաձայնության են եկել, որ ծխական դպրոցը վճարելու է 1.9 միլիոն դոլար ընդհանուր գումար տուժած կողմին: Տուժածներից յոթը հոգու դատապաշտպան Միչել Կարապետյանը մանրամասնել է «Road to Recovery Inc.-ի» (Ճանապարհ դեպի վերականգնում) կազմակերպած մամուլի ասուլիսի ժամանակ, որ յուրաքանչյուր տուժած կստանա 65-ից 115 հազար դոլարՙ ըստ հասցված վնասի բնույթի, ծանրության եւ հաճախականության:
Ի դեպ, «Spotlight» օսկարակիր ֆիլմում, որտեղ քննության է առնվում Մեսեչուսեթսում կաթոլիկ եկեղեցու հոգեւորականների կողմից նմանատիպ մանկապղծության պարագան, իրավաբան Կարապետյանին մարմնավորում է Ստենլի Թուչչին:
