Արցախի ճանապարհը փակելու պատճառով 6 մանկահասակ երեխաները մնացել են առանց ծնողների. հայտնում է «Շիրակ կենտրոն» հկ նախագահ Վահան Թումասյանը։
Արհավիրքներով լի մեր կյանքում այս մեկ տող ինֆորմացիան, ցավոք, սովորական է դարձել, այնինչ իրական ողբերգություն է թաքնված այս մեկ տողի հետևում։ 6 մանկահասակ քույրերը մնացել են առանց ծնողական խնամքի ու հոգածության։ Գյուղացիներն ու համայնքի ղեկավար են նրանց մասին հոգ տանում։ Երեխաներն ապավինում են բարի մարդկանց հոգատարությանն ու ուշադրությանը։
«Երեխաների ընտանիքը Արցախից է եկել, ավագ եղբայրը զոհվել է 44 -օրյա պատերազմում: Մայրը ընտանիքին հասանելիք բնակարանի համար անհրաժեշտ փաստաթղթերի համար մեկնել է Արցախ և շրջափակման պատճառով մոտ մեկ ամիս է՝ մնացել է այնտեղ ու չի կարողանում հետ գալ իր մանկահասակ երեխաների մոտ»,- պատմում է Վահան Թումասյանը։
«Շիրակ կենտրոն» հկ-ն 6 քույրերի համար վառելափայտ է տարել։
