Ամերիկայի հայկական թանգարանը (ALMA) եւ Հարվարդի Սեմական թանգարանը միասին ծրագրել են ապրիլի 15-ին Ուոթերթաունի հայկական թանգարանում ցուցադրել Թիմ Սլեյդի «Հիշողության ավերումը» ֆիլմը, որը հիմնված է Ռոբերտ Բեվանի համանուն գրքի վրա:
Ըստ «Արմինյն Միրոր-Սփեքթեյթրի» ֆիլմը պատմում է ցեղասպանության շրջանակներում կատարված եւ կատարվող մշակութային արժեքների ավերմանը, որ մարդկությանը պատճառում է ահռելի վնասներ:
Մշակութային արժեքների դեմ պայքարը գնալով ավելի սաստկանում է: Ֆիլմում դրա մասին են արտահայտվում ՅՈՒՆԵՍԿՕ-ի գլխավոր տնօրենը, Միջազգային քրեական դատարանի դատախազը, Հարվարդ համալսարանի իսլամական ճարտարապետության վավերագրական կենտրոնի տնօրենը եւ այլ ճանաչված մասնագետներ:
Ֆիլմի ցուցադրումից հետո նախատեսվում է քննարկում Թիմ Սլեյդի, Հարվարդ համալսարանից Անդրաշ Ռիդլմեյերի եւ Սեմական թանգարանից Ջոզեֆ Գրինի հետ: Ռիդլմեյերը Օսմանյան կայսրության պատմության եւ մշակույթի մասնագետ է, ով 25 տարի ուսումնասիրել է եւ վավերագրել Բալկանյան պատերազմի (90-ական թվեր) ժամանակ կատարված մշակութային վանդալիզմը: Գրինը հնագիտության դոկտոր է եւ Թունիսում է աշխատել 80-ական թվերին:
