ԱԺ «Քաղաքացիական պայմանագիր» խմբակցության պատգամավոր Արման Եղոյանը որևէ մեկնաբանություն չունի Լաչինի միջանցքի թիվ 1 հենակետում ռենտգեն-սկաների տեղադրման հնարավորության վերաբերյալ։
«Չէ, չէ, մեկնաբանություն չկա»,-Azg.am-ի թղթակցի հետ զրույցում հարցը լսելուն պես կտրուկ արձագանքեց իշխանական պատգամավորը։
Հաջորդող հարցին՝ իսկ ի՞նչ է կարծում՝ ինչո՞ւ ադրբեջանցիները նախօրեին բնապահպանական կեղծ նկատառումներով մի քանի ժամով փակեցին Ստեփանակերտ-Գորիս մայրուղու՝ Շուշի-Քարինտակ խաչմերուկի հատվածը, Եղոյանը պատասխանեց.
«Կոնկրետ մեկնաբանություն չկա. էդ կլինի մեկնաբանություն էլի, եթե ինչ-որ մի բան ասեմ։ Չէ, էդ թեմայով՝ ոչ մի բան»։
Հիշեցնենք, որ ԱՀ ԱԽ տարածած հայտարարության համաձայն՝ ՌԴ խաղաղապահների կողմից դիտարկվել է Լաչինի միջանցքի թիվ 1 հենակետում ռենտգեն-սկաների տեղադրման հնարավորությունը՝ մտնող տրանսպորտային միջոցների զննման նպատակով։
«Զանգվածային լրատվամիջոցներով տարածվող տեղեկությունն առ այն, թե իբր Արցախի Հանրապետությունում տեղակայված Ռուսաստանի Դաշնության խաղաղապահ զորակազմի հրամանատարությունը համաձայն է ադրբեջանական մաքսային կետ տեղադրել Լաչինի միջանցքում՝ իրականությանը չի համապատասանում»,- նշված է պաշտոնական հաղորդագրության տեքստում։
