Կլարք համալսարանի (Մասաչուսեթս) դասախոսներից պրոֆ. Թաներ Աքչամը համառորեն շարունակում է իր արխիվային պրպտումները եւ շոշափելի ապացույցներ հայտնաբերում ընդդեմ Հայոց ցեղասպանության ժխտողականության: Նրա վերջին «ծխացող ատրճանակ» հորջորջված հայնտաբերումը մի հեռագիր է հուլիսի 4, 1915 թվակիր, որն ուղարկել է Բեհաէդդին Շաքիրը, Էրզրումի նահանգի հատուկ ծառայությունների (Թեշքիլաթ-ի-Մահսուսա) պետը: Նա հարցնում է, թե արդյոք այդ շրջանից տեղահանված հայերը ոչնչացվա՞ծ են, արդյոք անհանգստություն պատճառող անհատները վերացվա՞ծ են: «Խնդրում եմ անկեղծորեն զեկուցեք», գրում է նա իր ստորադասներին: Փաստաթուղթը, Աքչամի բնորոշմամբ, գրված է Օսմանյան վերտառությամբ պաշտոնական թղթի վրա, ինչը անհերքելի է դարձնում այն: Աքչամը հայտնաբերել է այս հեռագիրը հայ կաթոլիկ, գերապատիվ տեր Գրիգոր Կերկերյանի (այժմ հանգուցյալ) արխիվներում:
«Բոլորս գիտեինք դրա գոյության մասին: Շատ անգամ էր հիշատակված, նույնիսկ 1919-ի դատավարության մեղադրական վճռում էր մատնանշված, բայց ժխտողականության կողմնակիցները պնդում էին, որ դրանք կեղծ օրինակներ են: Այժմ բնօրինակը հայտնաբերված է», նշել է Աքչամը մայիսի 11-ին Ամերիկայի հայկական թանգարանում (ALMA, Ուոթերթաուն) կազմակերպված «Ծխացող ատրճանակի պատմությունը» վերնագրով դասախոսության ընթացքում:
Կերկերյանը ցեղասպանությունը վերապրածներից էր: Կորցրել էր հորը, եւ 6 քույրերին ու եղբայրներին: Հաստատվել էր Կահիրեում (Եգիպտոս), նախքան ԱՄՆ տեղափոխվելը:
