500 ՄԻԼԻՈՆ ԴՈԼԱՐ ՔԸՐՔՈՐՅԱՆԻՑՙ ԲԱՐԵԳՈՐԾՈՒԹՅԱՆԸ

Հ. Ծ.

Լոս Անջելեսի Գերագույն դատարանի դատավոր Մարիա Ստրատոնը ընդառաջելով Քըրք Քըրքորյանի թողոնի գործադիր պատասխանատուների խնդրանքին, թույլատրել է նրա 1,6 միլիարդ դոլարի ընդհանուր ակտիվներից 500 միլիոն դոլար դուրս հանել բարեգործական նպատակներով օգտագործելու համար: Գումարը պետք է տնօրինի երեք հոգուց բաղկացած հանձնախումբը: Նույն դատավորը դրանից առաջ 200 միլիոն դոլարի թույլտվություն էր տվել Քըրքորյանի կտակի պատասխանատուներին նույն նպատակի համար: Քըրքորյանն իր կտակում հատուկ նշել է, որ իր ունեցվածքը մահվանից հետո 3 տարում պետք է ամբողջովին օգտագործվի եւ բաժանվի բարեգործական նպատակներով: Այս անգամվա 500 միլիոն դոլարի թույլատվությունը մի փոքր ձգձգվել է հատկապես նրա նախկին եւ վերջին կանանցՙ թողոնից ինչքան հնարավոր է շատ փող պոկելու ջանքերի պատճառով: Կանանցից մեկը Ունա Դեյվիսն է, որի հետ ընդամենը 57 օր ամուսնացած է եղել Քըրքորյանը: Մյուսըՙ Վանեսա Սանդինն է, որ հայտ է ներկայացրել, թե Քըրքորյանն իրեն 20 միլիոն դոլար է խոստացել: Փաստաբանները երկուսի պահանջներն էլ «անհիմն» են համարել: