Սեպտեմբերի 13-14-ին ռազմական գործողությունների հետևանքով թշնամին բարելավել է իր դիրքերը Գեղարքունիքի, Սյունիքի և Վայոց ձորի մարզերում. այս մասին են փաստում ՀՀ նախկին ՄԻՊ, Իրավունքի և արդարության կենտրոն «Թաթոյան» հիմնադրամի իրականացրած փաստահավաք աշխատանքները:
Ըստ Արման Թաթոյանի՝ ադրբեջանական զինված ուժերի նշանառության տակ են գտնվում «Տաթև» ՀԷԿ–ը, Ջերմուկի ՀԷԿ–ը, Կապանի պոչամբարը, ճանապարհներ և այլ ռազմավարական նշանակության օբյեկտներ։
«Սեպտեմբերյան էսկալացիայից հետո ստեղծված խնդիրները վերաբերում են ոչ միայն մարդու իրավունքների պաշտպանությանը, այլեւ ազգային անվտանգությանը, քանի որ հակառակորդի թիրախի տակ են հայտնվել ոչ միայն գյուղերը, այլեւ «Տաթեւ» ՀԷԿ-ը, Ջերմուկի ՀԷԿ-ը, Կապանի պոչամբարը եւ ռազմավարական այլ օբյեկտներ»,- նշեց Թաթոյանը:
Վայոց ձորի մարզի Ջերմուկ քաղաքի անմիջական հարևանությամբ` ՀՀ օկուպացված տարածքում, Ադրբեջանն անօրինական շինարարության և ամրացման աշխատանքներ է իրականացնում: Այդ աշխատանքները, ըստ Թաթոյանի, սկսվել են 2022 թ.-ի սեպտեմբերի 13-14-ին ՀՀ ինքնիշխանի տարածքի նկատմամբ ադրբեջանական ագրեսիայից հետո։
«Ադրբեջանցիների գործողությունները վկայում են, որ չեն պատրաստվում հեռանալ ՀՀ–ից։ Ջերմուկի անմիջական հարևանությամբ՝ ՀՀ օկուպացված տարածքներում, Ադրբեջանն իրականացնում է անօրինական շինարարության և ամրացման աշխատանքներ` կառուցում են ճանապարհներ, դիրքեր, բունկերներ և այլն։ Կառուցված ճանապարհը, ըստ մեր ուսումնասիրության, 10-12 մ լայնություն ունի»,– նշեց Թաթոյանը։
Ջերմուկի մոտ օկուպացված տարածքներում, թշնամու վերահսկողության կամ ուղիղ նշանառության տակ են հայտնվել խոտհարքներ, արոտավայրեր, վարելահողեր։
Սեպտեմբերի 13-ի հարձակումների ընթացքում միայն Ջերմուկի հատվածից ադրբեջանցիները հափշտակել են ՀՀ քաղաքացիներին պատկանող 4 մարդատար «Նիվա» մակնիշի և 3 բեռնատար ավտոմեքենա։ Հափշտակել են նաև մինչև 6 հազար ոչխար, միայն մեկ քաղաքացուց 1300 ոչխար են տարել. նշեց Թաթոյանը:
«Այսինքն՝ նրանք ոչ միայն իրենց ներկայությամբ են խնդիրներ առաջացնում, այլև ակտիվ գործողություններով են դա անում»,-ասաց նա։
«Թաթոյան» հիմնադրամը ձեռքի տակ եղած ադրբեջանական հանցավոր գործողություները հավաստող փաստերն ու ապացույցները ԵՄ, ԵԱՀԿ և միջազգային այլ կառուցների կուղարկի:
