Բեյսայդի (Նյու Յորք) Սրբոց նահատակաց հայկական եկեղեցու հոգեւոր հովիվ Աբրահամ Մալխասյանը «Միրոր-Սփեքթեյթրին» տեղեկացնում է, որ մոտ երեք տարիների հետեւողական աշխատանքի շնորհիվ վերջապես հաջողվել է քաղաքի 210-րդ փողոցը Հորաս Հարդինգ արագընթաց ճանապարհից սկսած մինչեւ 58-րդ պողոտա հարանվանել «Հայաստանի ճանապարհ» (Armenia Way):
Ծրագիրը, ըստ Մալխասյանի, մտահղացվել էր Հայոց ցեղասպանության հարյուրամյակի օրերին, համայնքային խորհրդի կողմից, սակայն ծրագիրը հաջողությամբ չէր պսակվել: Քաղաքական մթնոլորտի փոփոխության հետեւանքում հարցը նորից է արծարծվել եւ հունվարի 8-ին միաձայն որոշում է ընդունվել փողոցը խորհրդանշանակորեն հարանվանել ի պատիվ Հայաստանի: Գործը տքնաջան աշխատանք է պահանջել, եւ հոգեւոր հայրը տուն-տուն այցելելով աջակցություն է հայցել, վստահեցնելով բնակիչներին, որ հասցեի փոփոխություն չի կատարվելու: Պարզապես փողոցը կրելու է նաեւ այդ անունը: Պաշտոնական ցուցատախտակը կտեղադրվի շուտով:
Համայնքը ողջունել է լուրը եւ լավ նվեր համարել այն Սրբոց Նահատակաց եկեղեցու 60-ամյակի առթիվ:
Նկար 1. Հայաստանի ճանապարհը Բեյսայդում:
