Հայկական գործոն կա, բայց այն չի աշխաում հայկական պետականության ու հայկական շահի օգտին, այլ աշխատում է հօգուտ թշնամու. այս մասին «Հայկական օրակարգ. շարունակություն` հանրահավաքներից հետո» թեմայով պանելային քննարկման ժամանակ ասաց ՀՅԴ ԳՄ անդամ, «Երկիր Մեդիա» ՀԸ տնօրեն Բագրատ Եսայանը։
«Այս մարդիկ, որ եկել են իշխանության, հստակ իրենց նպատակներում ունեցել են այն, ինչին այսօր աստիճանաբար հասցել են՝ 29 հազար 800 ք/կմ»,- նշեց ՀՅԴ անդամը:
Բանակցային գործընթացում հայկական կողմը հայտնվել է փակուղում, ինչն իշխանության որդեգրած զրոյական ու սեփական կետից սկսելու արդյունք է:
«Խնդիրը շատ ավելի մեծ է, քան Նիկոլին քշելու օրակարգը։ Նիկոլին քշելը նախապայման կարող է լինել, բայց հայկական պետականության պահպանման օրակարգը շատ ավելի մեծ օրակարգ է, որը եթե կարողանաս ներկայացնել հասարակության լայն զանգվածներին, առաջին հարցը կդառնա երկրորդական, Նիկոլն ինքնըստինքյան կգնա»,- ասաց Եսայանը։
Ըստ նրա՝ այս իշխանության հետ հնարավոր չէ համազգային համախմբում, այն հնարավոր է միայն ազգային պետականությունը չկորցնելու օրակարգի շուրջ:
«Մենք չենք կարող համարվել լիարժեք գործոն, որովհետև չունենք այն լծակները, որոնցով պետք է կանգնեցնենք պետականության կործանման գործընթացը, մենք ուղղակի կարող ենք ցույց տալ, որ առնվազն կա հայ ժողովրդի մի ստվար հատված, որը դեմ է պետականության կործանմանը և պատրաստ է այս ուղղությամբ համախմբվել»,- նշեց ՀՅԴ անդամը:
Այսօր պետականության կործանման օրակարգը միայն քաղաքական ուժերի օրակարգը չի, այն ՀՀ յուրաքանչյուր քաղաքացու օրակարգը պետք է լինի. համոզված է Բագրատ Եսայանը:
Ավելին՝ տեսանյութում:
