Շիրակի մարզի Ազատան գյուղում մարտի 7-ին շահագործման հանձնվեց 70 կվտ հզորությամբ արեւային ֆոտովոլտային կայան: Այն կառուցվել է «Եվրասիա» բարեգործական ՀԿ-ի եւ Հայաստանում Ճապոնիայի դեսպանության գործակցությամբ, «Դրամաշնորհային աջակցություն հանուն մարդկության անվտանգության» համատեղ ծրագրով: Կայանի բացմանը ներկա էին Շիրակի մարզպետ Տիգրան Պետրոսյանը, ՀՀ-ում Ճապոնիայի դեսպան Ջուն Յամադան, բարեգործական ՀԿ-ի, համայնքի ղեկավարները, ազատանցիներ, հյուրեր: Մասնավորապես կարեւորվեց գլոբալ տաքացման ժամանակներում մարզում էներգիայի այլընտրանքային միջոցի գործարկումը: Շրջակա միջավայրը պակաս կաղտոտվի, համայնքն էլ միջոցներ կտնտեսի այլ խնդիրների լուծման համար:
Ֆոտովոլտային կայանն արտադրելու է 100 հազար կվտ/ժ էլեկտրաէերգիա, ինչի շնորհիվ շրջակա միջավայր կարտանետվի 50 հազար կիլոգրամով պակաս ածխաթթու գազ: Ինչպես մեզ տեղեկացրեց Ազատանի համայնքապետ Վարդան Իկիլիկյանը , նախատեսվում է որոշակի օրենսդրական կարգավորումից հետո անվճար էներգիայով ապահովել գյուղի հանրակրթական դպրոցը, մանկապարտեզը, բուժամբուլատորիան եւ այլ ենթակառուցվածքներ:
