Այս վերնագիրն է կրում թուրք բանտարկված վիպասան եւ լրագրող Ահմետ Ալթանի նոր հատորը, որ վերջերս է հրատարակվել: Սիմոն Կալոուն «Գարդիան» անգլիական թերթում գրախոսելով այն գրում է, որ գիրքը բաղկացած է ոչ երկար գլուխներից, որոնցից ամեն մեկը նվիրված է հեղինակի բանտային կյանքի դրվագներից կարեւորագույններին: «Դրանք լավ ընտրված, էական փաստեր պարունակող, բավականին թափանցիկ գրություններ են, զուրկ ավելորդ բառակույտերից: Պարտադիր կարդալու մի հատոր, որը հիշեցնում է մեզ իր նախորդ «Like a Sword Wound» (Ինչպես թրի պատճառած վերքը) եւ «Endgame» (Ավարտախաղ) գրքերը:
Նրա ձերբակալությունը զարմանալի չէր: Քրդերի համար հավասար պայմաններ պահանջող «Միլիեթ» թերթում տպագրված նրա «Աթաքուրդ» հոդվածը 1995-ին զայրացրել էր իշխանություններին, որոնք 20 ամսվա հետաձգված կատարմամբ դատավճիռ էին կայացրել նրա դեմ եւ 12 հազար դոլարի տուգանք: 2007-ին իր հիմնադրած «Թարաֆ» սատիրական թերթում տպագրած «Օհ, իմ եղբայր» հոդվածը դարձյալ մեծ աղմուկ էր առաջացրել: Այլախոհությունը նրա ընտանիքի տարերքն է: Հայրըՙ Չեթինը գրող, բանավեճային լրագրող եւ պատգամավոր էր եղել, որին հետապնդել էին իշխանությունները ժամանակին: Հիմա իր հերթն էր եկել: «Ես գլորվում եմ Հադեսի թագավորության խորքերը, որտեղ իմ հերոսն ու ես թաղվում ենք մթության մեջ», գրում է նա, շարունակելով. «Բայց ես Ոդիսեւսի նման պայքարելու եմ ճաշակելով պարտություններ եւ հաղթանակներ»: Նաեւ ավելացնելովՙ «Դուք կարող եք բանտարկել ինձ, բայց չեք կարող ինձ այստեղ պահել, որովհետեւ կախարդական փայտիկի միջոցով ես կարող եմ հեշտությամբ այս պատերից դուրս սողոսկել»:
Գիրքը, ըստ գրախոսողի, հրատարակվել է Ալթանի իր փաստաբանին փոխանցած գրառումները ի մի բերելով: Անգլերեն է թարգմանված Ալթանի ընկերոջՙ Յասմին Չոնգարի կողմից:
Ալթանի ազատ արձակման համար բողոքել են Նոբելյան մրցանակի արժանացած 80 գիտնականներ:
