Սեպտեմբերի 6-8 Ռուսաստանի հեռավորարեւելյան Վլադիվոստոկ քաղաքում տեղի ունեցավ 7-րդ Արեւելյան տնտեսական համաժողովը: Նրա աշխատանքներին մասնակցում էր Հայաստանի կառավարական պատվիրակությունը Նիկոլ Փաշինյանի գլխավորությամբ: Հայաստանի վարչապետը ՌԴ նախագահ Վլադիմիր Պուտինի, Միանմայի եւ Մոնղոլիայի վարչապետերի, Չինաստանի խորհրդարանի նախագահի հետ միասին ելույթ ունեցավ համաժողովի բացմանը` լիագումար նիստում: Նրա ելույթում մի քանի ուշագրավ դիտարկումներ կային, որոնք չեն կարող աննկատ մնալ Հայաստանով հետաքրքրվողների համար:
Առաջինն այն է, որ վարչապետը երկու անգամ, խոսելով հայ-ռուսական հարաբերությունների մասին, հայտարարեց, որ դրանք կրում են ռազմավարական դաշինքի բնույթ: Սա կարեւոր է, որովհետեւ հերքում է Երեւանում եւ Մոսկվայում որոշ քաղաքական ու լրատվական շրջանակների այն մանիպուլիացիան, թե հայ-ռուսական հարաբերությունների մակարդակն այժմ ավելի ցածր է, քան նախկինում: Երկրորդ՝ Ն. Փաշինյանը խոսեց այն հեռանկարի մասին, որը բացում է Ռուսաստանի նախագահ Վ.Պուտինի միջնորդությամբ առաջ մղվող հայ-ադրբեջանական երկխոսությունը դրա հաջողության դեպքում: Մեծ Եվրասիայում փոքրիկ Հայաստանը կարող է օգուտներ փնտրել, դառնալով տարածաշրջանային միջանցքներից մեկը եւ «խաղաղության խաչմերուկ»: Հայաստանի վարչապետին հրավիրելով ելույթ ունենալ այս մեծ եւ հաջողված միջազգային համաժողովի բացման արարողության ժամանակ, կազմակերպիչները ցույց են տալիս միջազգային հանրությանը, որ ժամանակակից բազմաբեւեռ աշխարհում հարգվելու է պետությունների իրական ինքնիշխանությունը եւ մեծերն ու փոքրերը կարող են միասին քննարկել եւ աշխատել հանուն ընդհանուր բարեկեցության, բարգավաճման, խաղաղության եւ կայունության: Հենց բազմաբեւեռ աշխարհի մասին պնդումն է հետեւողականորեն առաջ մղում Ռուսաստանն իր դեմ պատժամիջոցներին չմիացած երկրների աջակցությամբ:
Համաժողովի բացմանը օնլայն մասնակցած Հնդկաստանի, Մալայզիայի եւ Վիետնամի ղեկավարները համաձայն կամ մոտ են եղել բազմաբեւեռ աշխարհի մասին ռուսաստանյան գնահատականներին:
Հայաստանն իրավունք ունի ակնկալելու, որ հայ-ռուսական տնտեսական, քաղաքական ու ռազմական համագործակցությունը, որի ամրապնդման գործում եւս մի քայլ արվեց Վլադիվոստոկում, կտա իր բարեբեր պտուղները:
Հետաքրքրական է, որ նույն օրերին ռուսաստանյան Հեռավոր Արեւելքում անցան միջազգային զինավարժություններ, որոնց մասնակցեցին 9 երկրների 2000 զինծառայողներ: Այդ զինավարժություններին մասնակցել են նաեւ Հայաստանի զինվորականները: Ուշագրավ է, որ նույն զինավարժությանը մասնակցում էին նաեւ զինվորականներ Ադրբեջանից:
ԱՐԱՄ ՍԱՖԱՐՅԱՆ
Քաղաքական վերլուծաբան
