Սեպտեմբերի 17-18-ին Մոսկվայի Զելենոգրադ շրջանի թատերական եւ մշակութային կենտրոնում՝ «Վեդոգոն» թատրոնում, տեղի կունենա «Երկնքից երեք խնձոր ընկավ» ներկայացման առաջնախաղը՝ ըստ հայազգի հայտնի ռուսական գրող Նարինե Աբգարյանի համանուն գրքի: Հայտնի է, որ 2015 թվականին Աբգարյանն այս վեպի համար արժանացել է «Յասնայա Պոլյանա» գրական մրցանակին: Բեմադրիչ Տատյանա Տարասովայի համար հեշտ չի եղել հայ հեղինակի ռուսերեն արձակի մեջ տեսնել թատերականություն, սակայն նա կարողացել է նրբորեն բեմ հանել անթարգմանելի ազգային էությունը: Ըստ նրա՝ վեպում պատկերված փոքրիկ գյուղի հանդարտ կյանքն իր սովորական մանրուքներում ստեղծում է մեծություն եւ մարդկային գոյության իմաստ: Գրքի գործողությունները տեղի են ունենում Հայաստանում, սակայն, ըստ Նարինե Աբգարյանի եւ Տատյանա Տարասովայի, այս պատմությունը համամարդկային է: «Մենք չենք կերպավորում հայերի կամ ռուսների. սրանք ընտանեականության, ազգակցական հարաբերությունների, մարդկային արժանապատվության զգացումը պահպանելու հավերժական թեմաներն են»,- ասել է Տարասովան:
Բեմադրության շնորհանդեսը տեղի է ունեցել աղմկոտ Մոսկվայի կենտրոնում գտնվող Գայանե Բրեյովայի գողտրիկ ռեստորանում: Ըստ ռուսական «Ռեւիզոր» մշակութային պորտալի՝ առավոտյան հանդիպումը հագեցած է եղել հայկական սուրճի, արևելյան համեղ քաղցրավենիքի ու մրգերի բույրերով, իսկ ամենակարևորը՝ հարազատների ու ընկերների մասին զրույցի ջերմությամբ: Պատի ազգային գորգի զարդանախշերը համահունչ են եղել գալիք առաջնախաղի համար «Վեդոգոն» թատրոնի բեմազարդերի տեսագրություններին:
Ավելացնենք, որ «Երկնքից երեք խնձոր ընկավ» վեպի հայերեն թատերականացված տարբերակն անցյալ տարվա սեպտեմբերից ներկայացվել է Ստեփանակերտի Վահրամ Փափազյանի անվան դրամատիկական թատրոնում (բեմադրիչ՝ Կարինե Քոչարյան) եւ այս տարի ցուցադրվել Եվրոպայում (Ֆրանսիա, Բելգիա, Ավստրիա եւ Լեհաստան):
Ա. Բ.
