Տղաները լավ մարզավիճակում են: Նրանց հնարավորություններն այս աշխարհի առաջնությունում ավելի բարձր եմ գնահատում, քան նախորդում էր: Բոլորն էլ ապացուցել են իրենց բարձր կարգը:
Այս մասին լրագրողների հետ զրույցում ասաց ազատ ոճի ըմբշամարտի Հայաստանի հավաքականի գլխավոր մարզիչ Հաբեթնակ Կուրղինյանը, ում գլխավորությամբ թիմը Երեւանում պատրաստվում է աշխարհի առաջնությանը:
Սեպտեմբերի 8-ին Հաբեթնակ Կուրղինյանը ներկայացրեց Հայաստանի հավաքականի վերջնական կազմը աշխարհի առաջնությունում. Մանվել Խնձրցյան (57 կգ), Արսեն Հարությունյան (61 կգ), Վազգեն Թեւանյան (65 կգ), Արման Անդրեասյան (70 կգ), Հրայր Ալիխանյան (74 կգ), Արման Ավագյան (79 կգ):
«6 ըմբիշ է մասնակցելու աշխարհի առաջնությանը: Նախորդ աշխարհի առաջնություն 4 մասնակից ունեինք: Մեր նման երկրի համար 6 ըմբիշով աշխարհի առաջնությանը մասնակցելը քիչ չէ, նույնիսկ ավելի է: Մնացած քաշային կարգերում չունենք այն մակարդակի ըմբիշներ, որոնց կվստահենք աշխարհի առաջնությունը: Ունենք հեռանկարային մարզիկներ, բայց մյուս քաշերում այս պահին չունենք մարզիկներ:
Հավաքականի առջեւ դրված է լավ մասնակցելու խնդիր: Այս 6 ըմբիշներն էլ այն մակարդակի վրա են, որ կարող են պայքարել մեդալների համար: Մարզիկների առջեւ խնդիր է դրված ամեն գոտեմարտ անցկացնել հաղթանակի համար: Այս ըմբիշները բոլորն էլ միջազգային մրցաշարերում ապացուցել են իրենց կարգը:
Արսեն Հարությունյանը, Վազգեն Թեւանյանը, Արման Անդրեասյանը, Խնձրցյանը մեդալների իրական հնարավորություն ունեն: Նույնը կասեմ Արման Ավագյանի մասին: Ճիշտ է՝ մեծահասակներում մեդալներ չի նվաճել, բայց մինչեւ 23 տարեկանների Եվրոպայի եւ աշխարհի մրցանակակիր է:
Թիմում, տղաների մոտ այս մեկ տարվա ընթացքում մեծ փոփոխություն է տեղի ունեցել, մասնավորապես, այս տարվա Եվրոպայի առաջնությունում մեդալներ նվաճելուց հետո հետո նրանց մակարդակը շատ է բարձրացրել:
Աշխարհի առաջնությանը պատրաստվել ենք տարբեր փուլերով՝ հավաքներ, միջազգային մրցաշարեր: Երեւանի հավաքից առաջ երկու հավաք ունեցանք Ռուսաստանի հավաքականի հետ այնտեղ: Տղաների մարզավիճակը գնահատում եմ բարձր: Թե մեդալային առումով ինչ կլինի, չեմ կարող ասել, բայց նրանց մեդալ նվաճելու հնարավորություններն այս տարի ավելի բարձր եմ գնահատում, քան նախորդ աշխարհի առաջնությունում էր»,- ասաց Հաբեթնակ Կուրղինյանը:
Աշխարհի առաջնությունը տեղի կունենա սեպտեմբերի 10-18-ը Սերբիայի մայրաքաղաք Բելգրադում, ազատ ոճայինները պայքարի մեջ կմտնեն սեպտեմբերի 15-ից: Թիմը մրցավայր կմեկնի սեպտեմբերի 13-ին:
