ՀՀ պաշտպանության նախարարությունը երեկ ծանուցել է, թե հայ զինծառայողները մասնակցում են «Արեւելք-2022» ռազմավարական հրամանատարաշտաբային զորավարժությանը, որին մասնակցում են 14 պետությունների զինված ուժերի ստորաբաժանումներ: Հայկական զորախմբի հրամանատարն է գնդապետ Սասուն Բադասյանը: Սակավաբառ լրատվության մեջ չի խոսվում այն մասին, թե Հայաստանի հետ Ադրբեջանն էլ մաս է կազմում վերոնշյալ զորավարժանքին:
Գերմանական «Ֆրանկֆուրտեր ալգեմայնե ցայթունգը» սեպտեմբերի 1-ին նույն զորավարժության մասին հետեւյալն է փոխանցում.
«Ռուսաստանը խոշոր զորավարժություն է սկսում իր արեւելքում, որին մաս է կազմում ավելի քան 50 հազար զինվոր»: Թերթը կարծիք է հայտնում, թե Մոսկվան ցանկանում է ցույց տալ, որ այնպիսի երկրներ, ինչպիսիք Չինաստանն ու Հնդկաստանն են, նաեւ նախկին խորհրդային հանրապետություններն, իր զինակիցներն են: «Ուկրաինական պատերազմը դեռ չավարտված, հինգշաբթի օրը՝ սեպտեմբերի 1-ին սկսված, մոտ մեկ շաբաթ տեւողությամբ լայնածավալ ռազմական վարժանքներն անցկացվում են ուկրաինական մարտադաշտերից հազարավոր կիլոմետրեր հեռու, իրազեկում է ՖԱՑ-ը՝ հղում անելով ՌԴ պաշտպանության նախարարությանը եւ մասնավորեցնում է, թե Չինաստանի, Հնդկաստանի, Մոնղոլիայի կողքին զորավարժություններին մասնակցում են Բելառուսը, Հայաստանն ու Ադրբեջանը:
Այս կերպ Ռուսաստանը ցանկանում է ընդգծել այլ երկրների հետ իր համերաշխությունը Արեւմուտքի հետ ծայրահեղ լարվածության ժամանակ»:
Զորավարժությունը անվանել են «Վոստոկ 2022» (Արեւելք 2022): «Մոսկվայի տվյալներով, նախատեսվում է օգտագործել 5000 ռազմական մեքենա, 140 ինքնաթիռ, 60 ռազմանավ, այլ նավեր: Զորավարժությունը պետք է անցկացվի Արեւելյան Սիբիրում, Հեռավոր Արեւելքում, ինչպես նաեւ Ճապոնական ծովում՝ ռազմական վարժանքների համար նախատեսված վայրերում:
Արեւմուտքի ուշադրությանն է արժանացել հատկապես Չինաստանի եւ Հնդկաստանի մասնակցությունը», գրում է գերմանական «Ֆրանկֆուրտեր ալգեմայնեն»: «Աշխարհի՝ բնակչությամբ հարուստ երկու ատոմային երկրների հարաբերությունները սրվել են երկու տարի առաջ Հիմալայներում ընդհանուր սահմանին տեղի ունեցած ռազմական մի միջադեպից հետո, որ պատճառ դարձավ մի շարք զոհերի:
1,2 միլիարդ բնակչությամբ Հնդկաստանը մասնակցում է զորավարժանքին, թեեւ անցած ամիսներին Ուկրաինայի դեմ պատերազմում մշտապես ընդգծել է իր չեզոքությունը, հայտարարել, որ լավ հարաբերություններ ունի արեւմտյան երկրների եւ Ռուսաստանի հետ», հաղորդում է ՖԱՑ-ը:
Հնդկաստանը պաշտոնապես չի հայտարարել, թե «Վոստոկ 2022» զորավարժությանը մասնակցում է: Այս հանգամանքը գերմանական թերթը բացատրում է հետեւյալ կերպ՝ «Հնդկաստանի ռազմական տեխնիկայի մեծ մասը Ռուսաստանից է, մյուս կողմից՝ Հնդկաստանը ԱՄՆ-ի, Ճապոնիայի, Ավստրալիայի հետ հնդկա- խաղաղօվկիանոսյան երկրների Quad անվտանգության դաշինքի անդամ է»:
ԱՆԱՀԻՏ ՀՈՎՍԵՓՅԱՆ, Գերմանիա
