Ահազանգում է թուրք պատմաբան-ցեղասպանագետ Թաներ Աքչամը
Միջազգային բարձրագույն մակարդակի ցեղասպանագետ, Հայոց ցեղասպանությանը նվիրված հիմնարար աշխատությունների հեղինակ, Մ. Նահանգների եւ Կանադայի տարբեր համալսարանների դասախոս, պրոֆ. Վահագն Տատրյանի շիրիմը լքված եւ անտեր վիճակում է գտնվում, Երեւանում, առայժմ մեզ անհայտ գերեզմանատներից մեկում:
Այս մասին տեղեկանում ենք մեր քույր հրատարակության՝ «Պայքար» շաբաթահանդեսի (Բեյրութ- Լոս Անջելես) օգոստոս 28-ի համարից: Շաբաթահանդեսն իր հերթին տեղեկությունը քաղել է թուրք հայտնի պատմաբան, Հայոց ցեղասպանության մասնագետ-հետազոտող Թաներ Աքչամի ֆեյսբուքյան գրառումից, որում կարդում ենք.
«Խորապես ցնցված եմ եւ տխուր: Ձեզ հետ կիսում եմ Հայոց ցեղասպանության ուսումնասիրության հիմնադիր՝ պրոֆ. Վահագն Տատրյանի գերեզմանի լուսանկարները: Տատրյանի աճյունը Հայաստան փոխադրվեց եւ հողին հանձնվեց 2019-ին: Լոս Անջելեսի «Արարատ Էսքիջյան» թանգարանի տնօրեն Մեգի Գոշչինի համառ որոնումներից հետո, վերջապես հայտնաբերվեց թաղման վայրը: Այն էլ՝ միայն գերեզմանատան տնօրենության հետ հետեւողական բանակցություններից հետո: Տատրյանի աճյունները թաղել են առանց որեւէ ցուցանակի, էլ չենք խոսում տապանաքարի մասին. նրա շիրիմը ծածկված է մոլախոտով:
Հայոց ցեղասպանության հուշահամալիր տանող ճանապարհին փոքրիկ հուշատախտակներ, կիսանդրիներ կան, տնկված են եղեւնիներ՝ ի հիշատակ Ցեղասպանության ընթացքում հայերին օգնած օտարազգիների: Նրանց հիշում ենք ամեն քայլափոխի: Եվ, այսուհանդերձ, ցեղասպանագիտության հիմնադրի մարմինը տիրազուրկի պես շպրտված է գերեզմանատանը: Հիշեցնող ոչ մեկ ցուցանակ: Սա բոլոր հայերի ու նրանց բարեկամների համար անասելի խայտառակություն է: Իր կյանքը Հայոց ցեղասպանության ուսումնասիրությանը նվիրած եւ մեզ վեր բարձրանալու հարթակ տրամադրած Տատրյանն արժանի չէր նման վերաբերմունքի: Այստեղ ոչ ոքի չեմ մեղադրում: Թերացում կա, որը պետք է շտկել: Իսկ թե Հայաստանում ո՞վ է Տատրյանի գերեզմանի շինությամբ զբաղվել, մեզ հայտնի չէ: Առաջարկում եմ զգայուն լինել այս հարցի նկատմամբ եւ կատարել բոլորիս բաժին ընկնող պարտականությունը: Ես անելու եմ առավելագույնը՝ իմ եւ իմ կազմակերպության անունով»:
Հիշեցնենք, որ պրոֆ. Տատրյանը վախճանվել է 2019 թ. օգոստոսի 2-ին: Ու երեւակայել, որ օգոստոսի սկզբին տարբեր գաղութներում, ազգային-եկեղեցական տարբեր կազմակերպություններ նշել են նրա մահվան 3-րդ տարելիցը:
Ակնկալում ենք Հայաստանում համապատասխան մարմինների եւ առաջին հերթին՝ Ցեղասպանության թանգարան-ինստիտուտի արձագանքը: Լինելու ենք խիստ հետեւողական:
