Երեկ գերմանական տարբեր լրատվամիջոցներ, այդ թվում նաեւ «Բիլդը», հրապարակեցին ԳԴՀ ոստիկանության տարածած հաղորդագրությունը, թե Մայնի Ֆրանկֆուրտի օդանավակայանում չորեքշաբթիՙ օգոստոսի 28- ին առգրավվել է Հայաստանի մաքսային դրոշմակնիքով 48 000 ծխախոտ, որ տեղավորված է եղել երկու ճամպրուկներում: Ուղեբեռը, որի մեջ ծխախոտից բացի ուրիշ ոչինչ չի եղել, պատկանում է Աթենքից Մայնի Ֆրանկֆուրտ ժամանածՙ դաշնային ոստիկանությանն արդեն ծանոթ 33- ամյա մի վրացու, որին չորեքշաբթի օրն իսկ արտաքսել են Թիֆլիս: Ենթադրվում է, թե վրացին հասցրել է զգուշացնել իր «գործընկերներին»: Ոստիկանությունը նույն չվերթի 12 ճամպրուկ է հայտնաբերել, որոնց մեջ 230 000 ծխախոտ է եղել, դրանց տերերը ուղեբեռը թողել, փախել են, իսկ իրավապահները որոնում են նրանցՙ մի բելառուսի, երկու հայի, երեք ուկրաինացու:
Շաբաթներ առաջ գերմանական մամուլը դարձյալ անդրադարձել էր ԳԴՀ մաքսանենգ ճանապարհով հայկական ծխախոտ ներկրելու փաստին, ինչը ենթադրել է տալիս, թե սա բավական եկամտաբեր գործ է:
