Այսօրՙ ժամը 20:00-ին, «Սինոփսիս Արմենիա» ընկերության նախագահ Երվանդ Զորյանը HighTech Talks շարքի շրջանակում «Կամուրջ Սիլիկոնյան հովտից» թեմայով առցանց զրույց կվարի:
Հաղորդմանը հնարավոր կլինի ուղիղ եթերում հետեւել այստեղ (https://www.facebook.com/hakobarshakyanpage/), իսկ ավարտից հետո տեսանյութը կտեղադրվի YouTube-ում (https://www.youtube.com/channel/UC8cP-gVqC9z4rjJeAqyBjrQ):
ՀՀ բարձր տեխնոլոգիական արդյունաբերության նախարարությունը մարտի 31-ից մեկնարկել է առցանց HighTech Talks շարքը: Նախագծի առաջին հյուրն էր PicsArt ընկերության հիմնադիր եւ գլխավոր գործադիր տնօրեն Հովհաննես Ավոյանը, ով անցկացրեց «ՏՏ աշխարհը» թեմայով զրույցը:
Նախագիծը հյուրընկալում է հաջողված գործարարների եւ ՏՏ ոլորտի հեղինակավոր ներկայացուցիչների, որոնք կվարեն զրույցներՙ ներկայացնելով բարձր տեխնոլոգիաների ոլորտն իր ողջ հմայքով եւ կարծրատիպերով:
Ինչպես ողջ աշխարհում, այնպես էլ Հայաստանում նոր Կորոնավիրուսի տարածման հետեւանքով հազարավոր մարդիկ նոր մասնագիտացում ստանալու կարիք ունեն եւ հնարավորություն ունեն մուտք գործելու ՏՏ ոլորտ, ձեռք բերելու նոր հմտություններ ու գիտելիքներ, եւ ամենակարեւորըՙ մասնագիտություն:
HighTech Talks-ի (#Հայթեք զրույցներ) հետագա առցանց հաղորդումների շրջանակներում թեմատիկ ելույթներով հանդես կգան ոլորտիՙ հաջողություններ գրանցած մի շարք փորձառու ներկայացուցիչներ: Նրանք կխոսեն տեղեկատվական եւ հաղորդակցության տեխնոլոգիաների դրական եւ բացասական կողմերից, մեր կյանքում տեխնոլոգիաների դերից եւ թե ինչպես են դրանք վերափոխում մեր կյանքը, թե ինչ ազդեցություն են ունենում մարդկանց բարեկեցության եւ անվտանգության վրա, կվերլուծեն բարձր տեխնոլոգիական նորարարությունները, էկոհամակարգի զարգացման ու ստարտափների խնդիրներն ու հնարավորությունները:
