Ճգնաժամը բարձրացնում է քաղաքական գործչի վարկանիշը
Ո՞վ է Գերմանիայի հաջորդ կանցլերը, ո՞վ է փոխարինելու ԳԴՀ կանցլեր Անգելա Մերկելին։ Այս հարցն անշուշտ քննարկման բուռն առարկա էր ոչ միայն քրիստոնյա դեմոկրատական-քրիստոնյա սոցիալական միության շրջանակներում, այլեւՙ նոր կորոնավիրուսի համավարակից առաջ հանրության միտքը զբաղեցնող թեմաներից էր։
Բավարիա երկրամասում համավարակի դեմ պայքարի խիստ եւ արագ ձեռնարկված սահմանափակումները քրիստոնյա սոցիալական միության ղեկավար, երկրամասի վարչապետ 53-ամյա Մարկուս Զյոդերին հանրության մեծ մասի համար դարձրեցին կանցլերի հաջորդ ընկալելի, ընդունելի թեկնածու։ Մեր մասնավոր զրույցներում այս վարկածը հաստատող կարծիք առավել շատ էի լսում։ Ապրիլի 10- ին գերմանական dpa գործակալությունը տարածեց իր պատվերով YouGov կարծիքի ուսումնասիրման ինստիտուտի անցկացրած հարցման արդյունքը, ըստ որի հարցվածների 27 տոկոսը ցանկություն է հայտնել, որ դաշնային հաջորդ ընտրություններում Բավարիա երկրամասի վարչապետ Զյոդերը հայտ ներկայացնի Անգելա Մերկելին փոխարինելու։ Մինչ համավարակը, փետրվարի վերջին անցկացված հարցումների համաձայն ՔԴ- ՔՍ միության այլ թեկնածուներիՙ Բունդեսթագի խմբակցության նախկին ղեկավար Ֆրիդրիխ Մերցի, Հյուսիս Հռենոս Վեստֆալիա երկրամասի վարչապետ Արմին Լաշետի, Բունդեսթագի պատգամավոր Նորբերտ Ռյոթթգենի վարկանիշները կարծես մրցակցային առավելություն ունեին, իսկ այսօր նրանք նկատելի զիջում ենՙ առաջինին համակրում էր 18 տոկոսը, այժմՙ 12, երկրորդին ձայն կտար հարցվածների 9, այժմՙ 8 տոկոսը, երրորդինՙ նախկինումՙ 11, այժմՙ 3 տոկոսը։ Առողջապահության նախարար Յենս Շպահնին ձայն կտա 7 տոկոսը։ Բավարիա երկրամասի վարչապետ Մարկուս Զյոդերը բազմիցս հայտարարել է, թե չի ձգտում կանցլերի թեկնածության համար առաջադրվել։ Այս պահին ուժեղ կանցլեր ունենք, որ մեծ աջակցություն է ցույց տալիս Բավարիային, իսկ իմ տեղը կա ու կմնա մեր երկրամասումՙ Բավարիայում, dpa գործակալությանը տված հարցազրույցում փոխանցել է Զյոդերը։
Համավարակի պատճառով ստեղծված ճգնաժամը առավելություն է ստեղծում գործադիրի ղեկավար 65-ամյա Անգելա Մերկելի համար։ Նրա լուրջ դերն այս օրերին հատկապես ընդգծվում է ոչ միայն երկրի ներսում, այլեւ դրսումՙ այլ երկրների ղեկավարների հետ համեմատությամբ։ 16 տարի կառավարության ղեկավար Մերկելին նույն պաշտոնում գործունեությունը շարունակելու ցանկություն է հայտնել հարցվածների 30 տոկոսը։ 53 տոկոսը դեմ է նրա թեկնածության վերառաջադրմանը, հարցվածների 17 տոկոսը կարծիք չի հայտնել։ Փետրվարի վերջին անցկացված հարցման մասնակիցների 21 տոկոսն էր կողմ արտահայտվել Մերկելի պաշտոնավարման շարունակմանը, 64 տոկոսը դեմ էր եղել։ 2018- ի հոկտեմբերին Անգելա Մերկելը հրաժարվել էր քրիստոնյա դեմոկրատական կուսակցության ղեկավարի պաշտոնից եւ հայտարարել, թե հաջորդՙ 2021- ին կայանալիք ընտրություններում կանցլերի թեկնածության համար չի առաջադրվելու։
