Արեւիկ Քեշիշյան
OPEC+ նավթարդյունահանողների դաշինքը որոշել է համաշխարհային շուկայում նավթի առաջարկը նվազեցնել 10 տոկոսով։
Ինչպես հաղորդում են Bloomberg լրատվական գործակալությունը եւ Energy Intelligence ճյուղային ընկերությունը, դաշինքը մտադիր է օրական նավթարդյունահանումը մայիս-հունիս ամիսներին կրճատել 10 միլիոն բարելով։ Նախատեսվում է մայիս- հունիս ամիսներին արդյունահանել օրական 8,5 մլն բարել։ Դա նշանակալի կրճատում է նավթահանույթի ներկա ծավալների համեմատությամբ։ Սաուդյան Արաբիան ստիպված կլինի նավթարդյունահանումը կրճատել մոտավորապես 30%-ով, Ռուսաստանըՙ մոտ 15 տոկոսով։ OPEC+-ը մտադիր է նավթահանույթի կոչ անել նաեւ դաշինքի մեջ չմտնող երկրներին։ Դրանց թվին են դասվում օրինակ ԱՄՆ-ը, Նորվեգիան, Կանադան եւ Բրազիլիան։ Նրանք ստիպված կլինեն ներկայիս ցուցանիշների համեմատությամբ նավթարդյունահանումը կրճատել մոտավորապես 5 տոկոսով։
Հայտնի չէ, թե դա բավարար կլինի՞ արդյոք նավթի համաշխարհային շուկայի կայունացման համար։ Թեեւ OPEC+-ը նման չափերով երբեւէ չէր նվազեցրել նավթարդյունահանումը, բայց կորոնավիրուսի պատճառով մարդիկ ամենուրեք մեկուսացված են, օդային հաղորդակցությունը մեծ մասամբ դադարեցված է, նշում է գերմանական Handelsblatt հրատարակությունը։
Ի դեպ, Ռուսաստանը եւ Սաուդյան Արաբիան հասկացրել են, որ նավթի համաշխարհային հանույթի կրճատումը հնարավոր է միայն ԱՄՆ-ի մասնակցությամբ։ Այդ երեք պետությունները ներկայումս արդյունահանում են օրական մոտ 12 միլիոն բարել։ Սակայն Թրամփը ընդգծում է, որ ամերիկյան շատ ընկերություններ արդեն իսկ նվազեցրել են նավթարդյունահանումը նավթի գների անկման եւ հավելյալ կրճատումների պատճառով։
Ճգնաժամը խորանում է նաեւ նրանով, որ աշխարհում նավթի ազատ պահեստարաններ գրեթե չեն մնացել։ Սաուդցիները արդեն տասնյակ տանկերներ են վարձակալել որպես նավարկող պահեստարաններ։
