– Մարտունա կարտոլը ոսկուց էլա թանկ, տենց երգ կար է, քիչ-քիչ իրականություն ա դառնում,առնվազն կույր պիտի լինես, որ չնկատես թանկացումները:
Հայաստանում կարտոֆիլի գներն «աստղաբաշխական» են, հաշվի առնելով, որ բերքի սակավություն չի եղել: Երեւանում կարճ շրջայցն անգամ բավարար է նկատելու, թե մարդիկ որքան մտահոգված են սննդամթերքի շարունակական թանկացումից: Տեղեկացնենք, որ կարտոֆիլի մեկ կիլոգրամի արժեքը այժմ գերազանցում է 300 դրամը: Կարտոֆիլից բացի թանկ վաճառվում է նաեւ կաղամբն ու ստեպղինը (գազարը): Կարտոֆիլի գները աճել են 66,7 տոկոսով, խոզի մսինըՙ 40,2 տոկոսով, շաքարինըՙ 31,7 տոկոսով, ձվինըՙ 27,4, կարագինըՙ 14,2, կաթնամթերքինըՙ 10, հացինըՙ 9,8 տոկոսով եւ այսպես շարունակ:
«Կարտոֆիլը երկրորդ հացն է կարելի է ասել, այն չենք կարող ինչ-որ բանով փոխարինել, անցած տարիներին անգամ պարկերով էինք առնում ձմռան պաշար, հիմա օրվա հացի խնդիրը լուծելն է անգամ դժվար»,- ասում է տիկին Աննան:
Ըստ գյուղատնտեսների, ձմռան ամիսներին կարտոֆիլի գինն է՛լ ավելի է բարձրանալու, նախորդ տարվա համեմատՙ ավելի թանկ է լինելու:Նրանց խոսքերովՙ պատճառը ոռոգման ջրի պակասն է, որի մասին գյուղացիները բարձրաձայնում էին դեռ տարեսկզբին: Բավարար քանակությամբ ջուր չունենալու պատճառով կարտոֆիլի բերքն այս տարի սպասվածից քիչ է հավաքվել, ինչի հետեւանքով գինը բարձրացել է:
Էկոնոմիկայի նախարարի խոսքովՙ բերքի սակավություն չի եղել, բայց այն հարցին, թե լավ բերքի պարագայում ինչո՞ւ է կարտոֆիլը թանկացել, նախարարը մանրամասնում էՙ պատճառը արտահանման մեծ ծավալներն են:
«Մենք գիտենք կարտոֆիլի խնդրի մասին, բայց կարծում ենք, որ ստեղծված իրավիճակում չպիտի զրկենք մեր ֆերմերներին իրենց եկամուտներն ավելացնելու հնարավորությունից: Եթե հնարավորություն կա արտահանելու ավելի բարձր գնով, ուրեմն ճիշտ գինը դա՛ է»,- ասում է Քերոբյանը:
Պատգամավոր Բաբկեն Թունյանը իր ելույթում անդրադարձավ գնաճի խնդրին: Նա ընդգծեց, որ պետք է տարբերակել գնաճը գների աճից: Նա պնդեց, որ թանկացումը միջազգային գներով է պայմանավորված, եւ կա միջազգային վիճակագրություն, որը ցույց է տալիս, որ Հայաստանում գներն աճել են որոշ դեպքերումՙ ավելի քիչ, քան այլ երկրներում:
«Իհարկե, այն մարդկանց, որոնց եկամուտները ցածր են, այդ խնդիրները դրանից ամենեւին չեն թեթեւանում, բայց նաեւ պետք է փորձենք չշահարկել. օրինակ, կարտոֆիլի մասին, որ խոսում եք, ասում եքՙ ինչու են կարտոֆիլի գները թանկացել… թանկացել է, որովհետեւ կարտոֆիլի նկատմամբ պահանջարկն ավելացել է. ավելի շատ է արտահանվել, եւ գները, ըստ էության, բարձրացել են»,- հավելեց պատգամավորը:
Բայց թե՛ Բ. Թունյանը, թե՛ Վ. Քերոբյանը այդպես էլ չեն անդրադարձել այս տարի կարտոֆիլի միջինից ցածր բերքատվության պատճառներինՙ գարնանը կրճատված ցանքատարածքներին եւ չորային տարում ջրի ոչ ճիշտ կառավարմանը, ինչի մասին բազմիցս խոսել են գյուղատնտեսները, մամուլը:
Գուցե այն պատճառով, որ այդ հարցն իշխանությունների իրավասության ներքո է, իսկ արտահանումըՙ իներցիոն գործընթաց:
