Իսմայիլիայում վերջերս ավարտված միջազգային կինոփառատոնում ցուցադրվել է ռեժիսոր Գարուշ Ղազարյանի 16 րոպեանոց «Իմ սեւ սիրտը» (My Black Heart) ֆիլմը, որը Պողոս անունով մոտ 50 տարեկան մի երեւանցու մասին է:
Բազմաթիվ ֆինանսական խնդիրներ ունեցող տղամարդը հերթագրվել է, որ կառավարությունից ստանա «Նիվա» մակնիշի մի ավտոմեքենա, որը նա մտադիր է վաճառել իր պարտքերը փակելու համար: Անակնկալ շրջադարձերը փոխում են ամեն ինչ: Ֆիլմի պրոդյուսերն է Սոֆյա Հովհաննիսյանը: Նկարահանման գործընթացը հեշտ չի եղել: 2020-ի պատերազմն ու թագավարակի սահմանափակումները խոչընդոտել են, լուրջ ֆինանսական խնդիրներ են առաջացել: Բայց վերջապես հնարավոր է եղել հաղթահարել ամեն ինչ: «Ես շատ ուրախացա, երբ հայտնեցին, որ ֆիլմն ընդունվել է փառատոնում ցուցադրվելու համար», ասում է Գարուշը: Նա 24 տարեկան է, ծնվել է Արտաշատի շրջանի Լանջազատ գյուղում, բայց ապրում է Երեւանում: Մասնակցել է մի շարք կինոփառատոների, որոնցից առաջինը Մոլդովայում «The One» («Միակը») ֆիլմով: Հաջորդ ֆիլմը եղել է «Black Home, white Home»ը (Սեւ տուն, Սպիտակ տուն), իսկ երրորդը` 2021 թվին հայ-ուզբեկական համատեղ նկարահանված «Cycle» (Ցիկլ) ֆիլմն է: Գարուշը նաեւ «Զուլալի» (2021) գեղարվեստական ֆիլմի համառեժիսորն է: Այս ֆիլմը հունիսին ցուցադրվելու է Պորտ-Սայիդի (Եգիպտոս) միջազգային կինոփառատոնում: Նրա նախասիրած ռեժիսորն է սերբ Էմիր Կուստուրիցան:
Տեղեկացնենք, որ Իսմայիլիայի հայկական համայնքը փոքր է, բայց պահպանել է իր հայկական մշակութային արմատները:
ՀԱԿՈԲ ԾՈՒԼԻԿՅԱՆ
The Armenian Mirror-Spectator
