Գեւորգ Աբելյանի «Աննա հարսը» վեպն իտալերեն

Իտալական «Ռադիչի» հրատարակչությունը օրերս լույս է ընծայել լիբանանահայ գրող Գեւորգ Աբելյանի «Աննա հարսը» վեպի իտալերեն թարգմանությունը` «Հարսը. Հայերի ցեղասպանությունը Քեսաբում՝ Սիրիայում» վերնագրով։ Թարգմանությունն իրականացրել է Գեղամ Պոլոյանը՝ Դանիելա Մուսարդոյի համագործակցությամբ։ Մինչ այս Աբելյանի վեպը թարգմանաբար լույս է տեսել անգլերեն եւ արաբերեն։

Գեւորգ Աբելյանը (1941–2011) ծնվել էր Քեսապի Քյորքյունա գյուղում, նախնական ուսումը ստացել Քեսապի եւ Այնճարի Հայ աւետարանական վարժարաններում, բարձրագույնը՝ Բեյրութի Հայկազյան համալսարանում: Շուրջ 25 տարի ծառայել է կրթական ասպարեզում, ապա Այնճարում հիմնել է սեփական «Սավա» հաստատությունը եւ զբաղվել գրենական պիտույքների առեւտրով: Մասնակցել է կուսակցական, եկեղեցական եւ մշակութային գործերի։ Աշխատակցել է «Պատանեկան արձագանգ», «Սփիւռք», «Բագին», «Ազդակ» եւ այլ պարբերականների։ Հրատարակել է «Հելէ, Հելէ, Հելէ Քեսապ», «Աննա հարսը», «Ցկեանս նահատակութիւն» (թարգմանաբար լույս է տեսել արաբերեն եւ իսպաներեն), «Պէյրութ», «Նետենք-բռնենք…», «Աղբարի՜կ, ափիկ մը ջուր…», «Մաքարոնի թիլէկ-թիլէկ», «Քոյրիկս մի՛ ծախեր, մա՜մ» հատորները: Ձիւնական գրչանունով հրատարակել է հրապարակախոսական-երգիծական հոդվածներ։ Հետմահու՝ 2015-ին Այնճարում բացվել է Աբելյանի անվան գրադարան։

Թարգմանիչը՝ Գեղամ Պոլոյանը, ծնունդով սիրիահայ է։ Արաբերեն լեզվի եւ թարգմանության դասախոս է եղել Լեչեի եւ Բարիի համալսարաններում։ 2002-ից մինչ օրս արաբերենի մասնագետ լեզվաբան է Սալենտոյի համալսարանում, նաեւ Բարիի Արեւելագիտության ուսումնասիրության կենտրոնի նախագահն է։ Պոլոյանն արաբերենից եւ հայերենից թարգմանել է մի շարք գրքեր, այդ թվում՝ Աբդ ալ-Համիդ Բեն Հադուքայի «Ալժիրյան պատմությունները» (2004), Աղավնի Պողոսյանի «Արյան կանչը. Հիշողություններ… 1915 թվականի Հայոց ցեղասպանությունից» (2012), Աբդ ալ-Սալամի ալ-Ուգայլիի «Անապատի պատմողը» (2014), Նորա Արիսյանի «1915 թ. Հայոց ցեղասպանություն։ Սիրիացի արաբ մտավորականների մտքում» (2018), Հակոբ Պարոնյանի «Մեծապատիվ մուրացկանները» (2019)։ Գեղամ Պոլոյանը հեղինակ է նաեւ «Իսլամներն ու իսլամական կրօնը արաբ քրիստոնեական «Ալ Մասարրա» հանդեսում» (1999, արաբերեն) եւ «Արաբները. քրիստոնյաները եւ մահմեդականները Մերձավոր Արեւելքի համեմատությամբ» (2000, իտալերեն) աշխատությունների։

Ա. Բ.