Մարտի 31-ի առավոտյան Ադրբեջանի առաջին փոխնախագահ Մեհրիբան Ալիեւան Ինստագրամի իր էջում երկլեզու՝ ադրբեջաներեն եւ ռուսերեն հետեւյալ գրառումն է արել՝ «Ադրբեջանի ժողովուրդը երբեք չի մոռանա ողբերգությունը, որի ժամանակ մեր անմեղ հայրենակիցները սպանվեցին: Մենք միշտ հետամուտ կլինենք, որ այդ սարսափելի իրադարձությունների մասին ճշմարտությունը փորձ չարվի դույզն- ինչ նենգափոխել: Հարգում եմ 1918-ի մարտին ադրբեջանցիների ցեղասպանության զոհերի լուսավոր հիշատակը: Ալլահը թող խաղաղություն պարգեւի մեր բոլոր շեհիդների հոգիներին»:
Գրառումից 9 ժամ անց այն ստացել էր 7696 հավանում, 265 մեկնաբանություն: Ալիեւայի սույն գրառումը տարբեր լեզուներով տարածել է ադրբեջանական պետական լրատվական գործակալությունը՝ «Ազերթաջը», իր լրահոսում զետեղելով նաեւ հետեւյալ վերնագիրը՝ «Բաքվի պետական համալսարանում հարգանքի տուրք մատուցեցին մարտի 31-ի ցեղասպանության զոհերի հիշատակին»: Ըստ հիշատակված հոդվածի, ցուցադրվել է «Մարտի 31. ադրբեջանցիների ցեղասպանության օր» վերնագրով վավերագրական ֆիլմ, որի հեղինակը Ադրբեջանի պետական հեռուստատեսությունն է:
Բաքվի պետական համալսարանի ռեկտոր Էլչին Բաբաեւի ելույթից տեղեկանում ենք, թե ցեղասպանության վայրագության հեղինակները դաշնակ- բոլշեւիկներից կազմված խմբավորումներն են եղել, որ սպանել են 50 հազար ադրբեջանցու, որից Բաքվում՝ մոտ 30 հազարին: «Զանգեզուրում 115 գյուղ են քանդուքարափ արել, իսկ Էրիվանի նահանգում՝ 211 գյուղ», ռեկտորի խոսքն է փոխանցում «Ազերթաջը»: Նա հիշատակել է, որ Հեյդար Ալիեւը 1998-ի մարտի 26-ին իրավաքաղաքական գնահատական է տվել՝ մարտի 31-ը սահմանելով որպես «ադրբեջանցիների ցեղասպանության օր»: Իսկ Իլհամ Ալիեւի ջանքերով հետազոտական աշխատանք է կատարվում, որի ձեռքբերումն է զանգվածային դամբարանադաշտի հայտնաբերումը Գուբայում, որտեղ 2013-ին հուշահամալիր կառուցվեց: Ռեկտորն ընդգծել է, թե «2020-ին ադրբեջանական բանակը «Երկաթե բռունցք» գործողությամբ 44 օրում ոչնչացրել է հայկական ֆաշիզմը, որ տարածաշրջանի խաղաղությանն էր սպառնում»: «Այժմ մեր երկրի համար նոր դարաշրջան է սկսված՝ արարման դարաշրջան: Մենք կնորոգենք մեր մշակութային եւ պատմական հուշարձանները, որ հայերը ոչնչացրել էին: Չպետք է մոռանանք այդ իրադարձությունները, պետք է ուսումնասիրենք իրական պատմությունը, փոխանցենք հաջորդ սերունդներին: Սա յուրաքանչյուրիս քաղաքացիական պարտքն է», շեշտել է Բաքվի պետհամալսարանի ռեկտոր Բաբաեւը:
«Ազերթաջը» չի հրապարակել, եւ դժվար է ենթադրել, թե ասենք տարբեր երկրների դեսպանություններից պատվիրակներ են ներկա եղել այսպես կոչված ցեղասպանության հուշահանդեսին: Ալիեւայի գրառումը «զուսպ» է, ավելի ստույգ՝ զգույշ՝ չի հիշատակում հանցագործի, ոճրագործի անունը, փոխարենը համալսարանի ռեկտորի խոսքն է անկեղծ. ցինիկ է եւ մեզ համար «օգտակար»: Միջազգային կառույցների ուշադրությունը պիտի՛ հրավիրել այս փաստերի վրա: Երկարատեւ պայքար է սկսվում՝ ամեն օր կարելին եւ անկարելին անենք: Ստի վրա կառուցվածն ինչքա՞ն կդիմանա:
ԱՆԱՀԻՏ ՀՈՎՍԵՓՅԱՆ
Գերմանիա
