ՄԱԿ-ի արդարադատության միջազգային դատարանում էթնիկ զտման մասին թե՛ Հայաստանը, թե՛ Ադրբեջանը հայցեր ունեն ներկայացրած, բայց ի տարբերություն մեզ՝ ադրբեջանցիների ներկայացրած բողոքները՝ փաստարկների առումով, շատ ավելի ուժեղ են։ «Ազգ»ի հետ զրույցում նման կարծիք է հայտնում մարդու իրավունքի հարցերով փորձագետ Արա Ղազարյանը։
«Ադրբեջանցիները եվրոպական ատյաններում կոնկրետ լուսանկարներով ցույց են տալիս, թե ինչպես են նախկինում ադրբեջանաբնակ բնակավայրերը թալանվել կամ ավերվել մեր հայրենակիցների կողմից։ Դատավորը, տեսնելով, որ անգամ բնակավայրի կոյուղագծերն են հանված, չի մտածելու, թե դա ռազմական առավելության կամ ռազմական գործողությունների համար է արվել։ Մտածելու ու եզրակացնելու է, որ կոյուղի ու ջրագիծ ոչնչացնելը խաղաղ բնակիչների վերադարձի դեմ է ուղղված»,- մեկնաբանում է Ղազարյանը։
«Ազգ»ն ուսումնասիրել է էթնիկ զտման համատեքստում Ադրբեջանի կողմից ընդդեմ Հայաստանի ներկայացված հայցերը։ ՄԱԿ-ի արդարադատության դատարանում, իսկապես, հակառակորդն այնպիսի լուսանկարներ է ներկայացրել, որտեղ հստակ երեւում է՝ կոյուղագծերը հանված են։ Հարց է առաջանում՝ դեռեւս 2011-ին Ակնայում արված լուսանկարը (հայցի մեջ լուսանկարն այդ թվականին է վավերագրված) ինչպե՞ս է հայտնվել ադրբեջանցիների ձեռքի տակ։ Եթե նրանք Արցախ չեն այցելել, ապա դրանք մենք ենք մեր ձեռամբ նրանց տրամադրել, հուսամ՝ միամտորեն։ Ի՞նչ է ստացվում՝ տարբեր մարդկանց կամ լրագրողների կողմից նկարված սիրողական բնույթի լուսանկարներն ադրբեջանցիները վերցրել ու օգտագործել են մեր իսկ դեմ։ Փաստորեն՝ մեր ձեռքով մեր դեմ փաստեր ենք տրամադրել հակառակորդին։
ՍԵՎԱԿ ՎԱՐԴՈՒՄՅԱՆ
