Ընտրվեց Հայաստանի Հանրապետության գրիչը

«ՀՀ նախագահ Վահագն Խաչատուրյանն այսօր մակագրել է…» շուտով կլսենք ու կկարդանք այսպիսի տեղեկություններ:

Իսկ Վահագան Խաչատուրյանն օրվա մեջ ինքն իր մասին այսպիսի լուրեր լսելով՝ հաստատ սիրտը կփառավորվի:

Ինչո՞ւ ոչ, ստաբիլ, բարձր աշխատավարձ, իհարկե, կարգավիճակով, դերով ու կշռով՝ զուտ բուտաֆորիա, բայց կենսագրության մեջ կավելանա՝ 2022 թվականի մարտից մինչեւ… եղել է ՀՀ նախագահ՝ առաջադրվելով «Քաղաքացիական պայմանագիր» կուսակցության կողմից:

Այսինքն՝ նույնն է, թե Փաշինյանի հրահանգներն ու պարտադրանքները հնազանդորեն ստորագրող մի գրիչի ամեն օր՝ ժամը 9:00-ին, ծառայողական մեքենայով բերեն նախագահի նստավայր, երեկոյան ժամը 18:00-ին տուն տանեն, ու այդ գրիչն ամբողջ ամիս Փաշինյանին աջուղախ ստորագրություններ բաշխի, ամիսը մեկ անգամ էլ ինքն իր համար ստորագրի իր աշխատավարձի տակ ու հնազանդ, ենթարկվող լինելու համար պետբյուջեից կլորիկ գումար ստանա:

Մի գրիչի համար արժե՞ր ԱԺ նիստ հրավիրել, ՀՀ գրիչ առաջադրելու եւ քվեարկելու հարցն օրակարգում ընդգրկել այնպիսի հույժ կարեւոր խնդիրների կողքին, ինչպիսիք են, օրինակ, զինծառայողների վերաբերյալ հարցերը:

Գրիչն էլ գաղտնի քվերակությունից առաջ դեմքի լուրջ արտահայտությամբ ԱԺ ամբիոնից ասաց. «Պետք է կարողանանք խաղաղ ապրել բոլոր հարեւանների հետ, պետք է բարիդրացիական հարաբերություններ հաստատենք: Խոսելը, բանակցելն ավելի ճիշտ ճանապարհ է, քան որեւիցե մեկի հետ վիճելը, կռվելը կամ ուժ ցույց տալը: Ուժը կարող ենք ցույց տալ խելքով, գիտելիքով»:

Գրիչը նաեւ հայտարարել է, թե իր համար ամբողջությամբ ընդունելի է ՀՀ կառավարության հայտարարած խաղաղության դարաշրջան բացելու գաղափարն ու ինքը պետք է լծվի այդ գործին: Այսինքն՝ սիրուն ձեւով, պլստալով արդեն մտել է Փաշինյանի…. ծոցագրպանը՝ գրիչների տեղը. իսկ դո՞ւք ինչ մտածեցիք:

Բայց գրի՞չ, թե ինքնահոս. ո՞ր անունն է ճիշտ: Ինքնահոսը մեկ-մեկ կարող է ինքն իրեն հոսել, ընդվզել, թանաք ժայթքել, բծեր թողնել ու աղտոտել այնպիսի անհարկի տեղերում, որ տերը հունից դուրս գա, կատաղի ու դեն գցի:

Չէ, ավելի լավ է՝ հարմարվող, հնազանդ բնույթ ունենանալու պատճառով 1990-ականներից օգտագործված, 20 տարի մոռացված ու փոշոտված, թանաքը հազար անգամ փոխած, մի քանի անգամ տարբեր աթոռներին վախից թանաք թափած, բայց անշառ, թառամած գրիչ, քան թե անկանխատեսելի ինքնահոս:

Ուրեմն՝ հաստատ, գրիչ: Ուրեմն արդեն ունենք Հայաստանի Հանրապետության, ավելի ճիշտ՝ Նիկոլի գրիչ:

ՆԱԻՐ ՅԱՆ